Job 21.20
Bible en Swahili de l’est

¹ Ndipo Ayubu akajibu, na kusema, ² Yasikizeni sana maneno yangu; Jambo hili na liwe faraja yenu. ³ Niacheni, nami pia nitanena; Tena nikiisha nena, zidini kudhihaki. ⁴ Mimi, je! Mashitaka yangu yamhusu mwanadamu? Nami kwa nini nisikose kusubiri? ⁵ Niangalieni, mkastaajabu, Mkaweke mkono kinywani. ⁶ Hata nikumbukapo nahuzunika, Na utisho wanishika mwilini mwangu. ⁷ Mbona waovu wanaishi, Na kuwa wazee, naam, na kuongezeka kuwa na nguvu? ⁸ Kizazi chao kinathibitika nao machoni pao, Na wazao wao mbele ya macho yao. ⁹ Nyumba zao zi salama pasina hofu, Wala fimbo ya Mungu haiwapigi. ¹⁰ Fahali wao huvyaza wala hapungukiwi na nguvu; Ng’ombe wao mke huzaa, asiharibu mimba. ¹¹ Huwatoa kama kundi watoto wao. Na watoto wao hucheza. ¹² Huimba kwa matari na kwa kinubi, Na kuifurahia sauti ya filimbi. ¹³ Siku zao hutumia katika kufanikiwa, Kisha hushuka kuzimuni ghafula. ¹⁴ Walakini walimwambia Mungu. Tuondokee; Kwani hatutaki kuzijua njia zako. ¹⁵ Huyo Mwenyezi ni nani, hata tumtumikie? Nasi tutafaidiwa nini tukimwomba? ¹⁶ Tazama, kufanikiwa kwao hakumo mkononi mwao; Mashauri ya waovu na yawe mbali nami. ¹⁷ Je! Ni mara ngapi taa yao waovu huzimishwa? Na msiba wao kuwajilia? Na Mungu kuwagawanyia uchungu kwa hasira yake? ¹⁸ Ili wawe kama mabua makavu mbele ya upepo, Kama makapi yaliyochukuliwa na dhoruba? ¹⁹ Mwasema, Mungu huwawekea watoto wa mtu huo uovu wake. Na amlipe mwenyewe, ili apate kuujua. ²⁰ Macho yake mwenyewe na yaone uharibifu wake, Akanywe ghadhabu zake Mwenyezi. ²¹ Kwani ana furaha gani katika mbari yake baada yake, Hesabu ya miezi yake itakapokwisha katwa katikati? ²² Je! Mtu awaye yote atamfundisha Mungu maarifa? Naye ndiye awahukumuye walioko juu. ²³ Mmoja hufa katika nguvu zake kamili, Mwenye kukaa salama na kustarehe; ²⁴ Vyombo vyake vimejaa maziwa, Na mafuta ya mifupani mwake ni laini. ²⁵ Mwingine hufa katika uchungu wa roho, Asionje mema kamwe. ²⁶ Wao hulala mavumbini sawasawa, Mabuu huwafunika. ²⁷ Tazama, nayajua mawazo yenu, Na mashauri mnayoazimia kwa uovu juu yangu. ²⁸ Kwa kuwa mwasema, Nyumba ya huyo mkuu i wapi? Na hema waliyoikaa hao waovu i wapi? ²⁹ Je! Hamkuwauliza wapitao njiani? Na maonyo yao hamyajui? ³⁰ Kwamba mwovu huachiliwa katika siku ya msiba? Na kuongozwa nje katika siku ya ghadhabu? ³¹ Ni nani atakayetangaza njia yake usoni pake? Tena ni nani atakayemlipa kwa hayo aliyofanya? ³² Pamoja na hayo atachukuliwa kaburini, Nao watalinda zamu juu ya ziara lake. ³³ Udongo wa bondeni utakuwa tamu kwake, Na watu wote watafuata nyuma yake, Kama vile walivyomtangulia watu wasiohesabika. ³⁴ Basi imekuwaje ninyi kunituza moyo bure, Kwa kuwa katika jawabu zenu unasalia uongo tu.