Job 5.21
Vulgate

¹ voca ergo si est qui tibi respondeat et ad aliquem sanctorum convertere
² vere stultum interficit iracundia et parvulum occidit invidia
³ ego vidi stultum firma radice et maledixi pulchritudini eius statim
⁴ longe fient filii eius a salute et conterentur in porta et non erit qui eruat
⁵ cuius messem famelicus comedet et ipsum rapiet armatus et ebibent sitientes divitias eius
⁶ nihil in terra sine causa fit et de humo non orietur dolor
⁷ homo ad laborem nascitur et avis ad volatum
⁸ quam ob rem ego deprecabor Dominum et ad Deum ponam eloquium meum
⁹ qui facit magna et inscrutabilia et mirabilia absque numero
¹⁰ qui dat pluviam super faciem terrae et inrigat aquis universa
¹¹ qui ponit humiles in sublimi et maerentes erigit sospitate
¹² qui dissipat cogitationes malignorum ne possint implere manus eorum quod coeperant
¹³ qui adprehendit sapientes in astutia eorum et consilium pravorum dissipat
¹⁴ per diem incurrent tenebras et quasi in nocte sic palpabunt in meridie
¹⁵ porro salvum faciet a gladio oris eorum et de manu violenti pauperem
¹⁶ et erit egeno spes iniquitas autem contrahet os suum
¹⁷ beatus homo qui corripitur a Domino increpationem ergo Domini ne reprobes
¹⁸ quia ipse vulnerat et medetur percutit et manus eius sanabunt
¹⁹ in sex tribulationibus liberabit te et in septima non tanget te malum
²⁰ in fame eruet te de morte et in bello de manu gladii
²¹ a flagello linguae absconderis et non timebis calamitatem cum venerit
²² in vastitate et fame ridebis et bestiam terrae non formidabis
²³ sed cum lapidibus regionum pactum tuum et bestiae terrae pacificae erunt tibi
²⁴ et scies quod pacem habeat tabernaculum tuum et visitans speciem tuam non peccabis
²⁵ scies quoque quoniam multiplex erit semen tuum et progenies tua quasi herba terrae
²⁶ ingredieris in abundantia sepulchrum sicut infertur acervus in tempore suo
²⁷ ecce hoc ut investigavimus ita est quod auditum mente pertracta