Psaumes 69.33
Bible en Swahili de l’est

Prière du juste opprimé

¹ Ee Mungu, uniokoe, Maana maji yamefika mpaka nafsini mwangu.
² Ninazama katika matope mengi, Pasipowezekana kusimama. Nimefika penye maji ya vilindi, Mkondo wa maji unanigharikisha.
³ Nimechoka kwa kulia kwangu, Koo yangu imekauka. Macho yangu yamedhoofu Kwa kumngoja Mungu wangu.
⁴ Wanaonichukia bure ni wengi Kuliko nywele za kichwa changu. Watakao kunikatilia mbali wamekuwa hodari, Adui zangu kwa sababu isiyo kweli. Hata mimi nalilipishwa kwa nguvu Vitu nisivyovichukua.
⁵ Ee Mungu, unajua upumbavu wangu, Wala hukufichwa dhambi yangu.
⁶ Wanaokungoja Wewe wasiaibishwe, Kwa ajili yangu, Bwana, MUNGU wa majeshi. Wanaokutafuta Wewe wasifedheheshwe, Kwa ajili yangu, Ee Mungu wa Israeli.
⁷ Maana kwa ajili yako nimestahimili laumu, Fedheha imenifunika uso wangu.
⁸ Nimekuwa mgeni kwa ndugu zangu, Na msikwao kwa wana wa mama yangu.
⁹ Maana wivu wa nyumba yako umenila, Na laumu zao wanaokulaumu zimenipata.
¹⁰ Nilipolia na kuiadhibu roho yangu kwa kufunga, Ikawa laumu juu yangu.
¹¹ Nilipofanya gunia kuwa nguo zangu, Nikawa mithali kwao.
¹² Waketio langoni hunisema, Na nyimbo za walevi hunidhihaki.
¹³ Nami maombi yangu nakuomba Wewe, Bwana, Wakati ukupendezao; Ee Mungu, Kwa wingi wa fadhili zako unijibu, Katika kweli ya wokovu wako.
¹⁴ Uniponye kwa kunitoa matopeni, Wala usiniache nikazama. Na niponywe nao wanaonichukia, Na katika vilindi vya maji.
¹⁵ Mkondo usinigharikishe, wala vilindi visinimeze, Wala shimo lisifumbe kinywa chake juu yangu.
¹⁶ Ee Bwana, unijibu, maana fadhili zako ni njema, Kwa kadiri ya rehema zako unielekee.
¹⁷ Wala usinifiche uso wako, mimi mtumishi wako, Maana mimi nimo taabuni, unijibu upesi.
¹⁸ Uikaribie nafsi yangu, uikomboe, Kwa sababu ya adui zangu unifidie.
¹⁹ Wewe umejua kulaumiwa kwangu, Na kuaibika na kufedheheka kwangu, Mbele zako Wewe wako watesi wangu wote.
²⁰ Laumu imenivunja moyo, Nami ninaugua sana. Nikangoja aje wa kunihurumia, wala hakuna; Na wa kunifariji, wala sikumwona mtu.
²¹ Wakanipa uchungu kuwa chakula changu; Nami nilipokuwa na kiu wakaninywesha siki.
²² Meza yao mbele yao na iwe mtego; Naam, wakiwa salama na iwe tanzi.
²³ Macho yao yatiwe giza wasione, Na viuno vyao uvitetemeshe daima.
²⁴ Uimwage ghadhabu yako juu yao, Na ukali wa hasira yako uwapate.
²⁵ Matuo yao na yawe ukiwa, Pasiwe na mtu wa kukaa hemani mwao.
²⁶ Maana wanamwudhi mtu uliyempiga Wewe, Wanasimulia maumivu ya hao uliowatia jeraha.
²⁷ Uwaongezee uovu juu ya uovu, Wala wasiingie katika haki yako.
²⁸ Na wafutwe katika chuo cha uhai, Wala pamoja na wenye haki wasiandikwe.
²⁹ Nami niliye maskini na mtu wa huzuni, Mungu, wokovu wako utaniinua.
³⁰ Nitalisifu jina la Mungu kwa wimbo, Nami nitamtukuza kwa shukrani.
³¹ Nayo yatampendeza Bwana kuliko ng’ombe, Au ndama mwenye pembe na kwato.
³² Walioonewa watakapoona watafurahi; Enyi mmtafutao Mungu, mioyo yenu ihuishwe.
³³ Kwa kuwa Bwana huwasikia wahitaji, Wala hawadharau wafungwa wake.
³⁴ Mbingu na nchi zimsifu, Bahari na vyote viendavyo ndani yake.
³⁵ Maana Mungu ataiokoa Sayuni, na kuijenga miji ya Yuda, Na watu watakaa ndani yake na kuimiliki.
³⁶ Wazao wa watumishi wake watairithi, Nao walipendao jina lake watakaa humo.