Ephésiens 4.26
Bible en Swahili de l’est

¹ Kwa hiyo nawasihi, mimi niliye mfungwa katika Bwana, mwenende kama inavyoustahili wito wenu mlioitiwa; ² kwa unyenyekevu wote na upole, kwa uvumilivu, mkichukuliana katika upendo; ³ na kujitahidi kuuhifadhi umoja wa Roho katika kifungo cha amani. ⁴ Mwili mmoja, na Roho mmoja, kama na mlivyoitwa katika tumaini moja la wito wenu. ⁵ Bwana mmoja, imani moja, ubatizo mmoja. ⁶ Mungu mmoja, naye ni Baba wa wote, aliye juu ya yote na katika yote na ndani ya yote. ⁷ Lakini kila mmoja wetu alipewa neema kwa kadiri ya kipimo cha kipawa chake Kristo. ⁸ Hivyo husema, Alipopaa juu aliteka mateka, Akawapa wanadamu vipawa. ⁹ Basi neno hilo, Alipaa, maana yake nini kama siyo kusema kwamba yeye naye alishuka mpaka pande zilizo chini za nchi? ¹⁰ Naye aliyeshuka ndiye yeye aliyepaa juu sana kupita mbingu zote, ili avijaze vitu vyote. ¹¹ Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu; ¹² kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; ¹³ hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo; ¹⁴ ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu. ¹⁵ Lakini tuishike kweli katika upendo na kukua hata tumfikie yeye katika yote, yeye aliye kichwa, Kristo. ¹⁶ Katika yeye mwili wote ukiungamanishwa na kushikanishwa kwa msaada wa kila kiungo, kwa kadiri ya utendaji wa kila sehemu moja moja, huukuza mwili upate kujijenga wenyewe katika upendo. ¹⁷ Basi nasema neno hili, tena nashuhudia katika Bwana, tangu sasa msienende kama Mataifa waenendavyo, katika ubatili wa nia zao; ¹⁸ ambao; akili zao zimetiwa giza, nao wamefarikishwa na uzima wa Mungu, kwa sababu ya ujinga uliomo ndani yao, kwa sababu ya ugumu wa mioyo yao; ¹⁹ ambao wakiisha kufa ganzi wanajitia katika mambo ya ufisadi wapate kufanyiza kila namna ya uchafu kwa kutamani. ²⁰ Bali ninyi, sivyo mlivyojifunza Kristo; ²¹ ikiwa mlimsikia mkafundishwa katika yeye, kama kweli ilivyo katika Yesu, ²² mvue kwa habari ya mwenendo wa kwanza utu wa zamani, unaoharibika kwa kuzifuata tamaa zenye kudanganya; ²³ na mfanywe wapya katika roho ya nia zenu; ²⁴ mkavae utu mpya, ulioumbwa kwa namna ya Mungu katika haki na utakatifu wa kweli. ²⁵ Basi uvueni uongo, mkaseme kweli kila mtu na jirani yake; kwa maana tu viungo, kila mmoja kiungo cha wenzake. ²⁶ Mwe na hasira, ila msitende dhambi; jua lisichwe na uchungu wenu bado haujawatoka; ²⁷ wala msimpe Ibilisi nafasi. ²⁸ Mwibaji asiibe tena; bali afadhali afanye juhudi, akitenda kazi iliyo nzuri kwa mikono yake mwenyewe, apate kuwa na kitu cha kumgawia mhitaji. ²⁹ Neno lo lote lililo ovu lisitoke vinywani mwenu, bali lililo jema la kumfaa mwenye kuhitaji, ili liwape neema wanaosikia. ³⁰ Wala msimhuzunishe yule Roho Mtakatifu wa Mungu; ambaye kwa yeye mlitiwa muhuri hata siku ya ukombozi. ³¹ Uchungu wote na ghadhabu na hasira na kelele na matukano yaondoke kwenu, pamoja na kila namna ya ubaya; ³² tena iweni wafadhili ninyi kwa ninyi, wenye huruma, mkasameheane kama na Mungu katika Kristo alivyowasamehe ninyi.