Luc 21.32
Bible en Swahili de l’est

¹ Akainua macho yake akawaona matajiri wakitia sadaka zao katika sanduku la hazina. ² Akamwona mjane mmoja maskini akitia mle senti mbili. ³ Akasema, Hakika nawaambia, huyu mjane maskini ametia zaidi kuliko wote; ⁴ maana, hao wote walitia sadakani katika mali iliyowazidi, bali huyu katika umaskini wake ametia vyote alivyokuwa navyo. ⁵ Na watu kadha wa kadha walipokuwa wakiongea habari za hekalu, jinsi lilivyopambwa kwa mawe mazuri na sadaka za watu, alisema, ⁶ Haya mnayoyatazama, siku zitakuja ambapo halitasalia jiwe juu ya jiwe ambalo halitabomoshwa. ⁷ Wakamwuliza wakisema, Mwalimu, mambo hayo yatakuwa lini? Nayo ni nini ishara ya kuwa mambo hayo ya karibu kutukia? ⁸ Akasema, Angalieni, msije mkadanganyika, kwa sababu wengi watakuja kwa jina langu, wakisema, Mimi ndiye; tena, Majira yamekaribia. Basi msiwafuate hao. ⁹ Nanyi mtakaposikia habari za vita na fitina, msitishwe; maana, hayo hayana budi kutukia kwanza, lakini ule mwisho hauji upesi. ¹⁰ Kisha aliwaambia, Taifa litaondoka kupigana na taifa, na ufalme kupigana na ufalme; ¹¹ kutakuwa na matetemeko makubwa ya nchi; na njaa na tauni mahali mahali; na mambo ya kutisha na ishara kuu kutoka mbinguni. ¹² Lakini, kabla hayo yote hayajatokea, watawakamata na kuwaudhi; watawapeleka mbele ya masinagogi, na kuwaua magerezani, mkipelekwa mbele ya wafalme na maliwali kwa ajili ya jina langu. ¹³ Na hayo yatakuwa ushuhuda kwenu. ¹⁴ Basi, kusudieni mioyoni mwenu, kutofikiri-fikiri kwanza mtakavyojibu; ¹⁵ kwa sababu mimi nitawapa kinywa na hekima ambayo watesi wenu wote hawataweza kushindana nayo wala kuipinga. ¹⁶ Nanyi mtasalitiwa na wazazi wenu, na ndugu zenu, na jamaa zenu, na rafiki zenu, nao watawafisha baadhi yenu. ¹⁷ Nanyi mtachukiwa na watu wote kwa ajili ya jina langu. ¹⁸ Walakini hautapotea hata unywele mmoja wa vichwa vyenu. ¹⁹ Nanyi kwa subira yenu mtaziponya nafsi zenu. ²⁰ Lakini, hapo mtakapoona mji wa Yerusalemu umezungukwa na majeshi, ndipo jueni ya kwamba uharibifu wake umekaribia. ²¹ Ndipo walio katika Uyahudi na wakimbilie milimani, na walio katikati yake wakimbilie nje, na walio katika mashamba wasiuingie. ²² Kwa kuwa siku hizo ndizo za mapatilizo, ili yatimizwe yote yaliyoandikwa. ²³ Ole wao wenye mimba na wanaonyonyesha katika siku hizo! Kwa kuwa kutakuwa na shida nyingi katika nchi, na hasira juu ya taifa hili. ²⁴ Wataanguka kwa ukali wa upanga, nao watatekwa nyara na kuchukuliwa katika mataifa yote; na Yerusalemu utakanyagwa na Mataifa, hata majira ya Mataifa yatakapotimia. ²⁵ Tena, kutakuwa na ishara katika jua, na mwezi, na nyota; na katika nchi dhiki ya mataifa wakishangaa kwa uvumi wa bahari na msukosuko wake; ²⁶ watu wakivunjika mioyo kwa hofu, na kwa kutazamia mambo yatakayoupata ulimwengu. Kwa kuwa nguvu za mbinguni zitatikisika. ²⁷ Hapo ndipo watakapomwona Mwana wa Adamu akija katika wingu pamoja na nguvu na utukufu mwingi. ²⁸ Basi mambo hayo yaanzapo kutokea, changamkeni, mkaviinue vichwa vyenu, kwa kuwa ukombozi wenu umekaribia. ²⁹ Akawaambia mfano; Utazameni mtini na miti mingine yote. ³⁰ Wakati iishapo kuchipuka, mwaona na kutambua wenyewe ya kwamba majira ya mavuno yamekwisha kuwa karibu. ³¹ Nanyi kadhalika, mwonapo mambo hayo yanaanza kutokea, tambueni ya kwamba ufalme wa Mungu u karibu. ³² Amin, nawaambieni, Kizazi hiki hakitapita hata hayo yote yatimie. ³³ Mbingu na nchi zitapita, lakini maneno yangu hayatapita kamwe. ³⁴ Basi, jiangalieni, mioyo yenu isije ikalemewa na ulafi, na ulevi, na masumbufu ya maisha haya; siku ile ikawajia ghafula, kama mtego unasavyo; ³⁵ kwa kuwa ndivyo itakavyowajilia watu wote wakaao juu ya uso wa dunia nzima. ³⁶ Basi, kesheni ninyi kila wakati, mkiomba, ili mpate kuokoka katika haya yote yatakayotokea, na kusimama mbele za Mwana wa Adamu. ³⁷ Basi, kila mchana alikuwa akifundisha hekaluni, na usiku huenda kulala katika mlima uitwao wa Mizeituni. ³⁸ Na watu wote walikuwa wakiamka mapema waende hekaluni ili kumsikiliza.