Psaumes 107.41
Bible en Swahili de l’est

Cinquième livre

La grâce divine

¹ Mshukuruni Bwana kwa kuwa ni mwema, Kwa maana fadhili zake ni za milele.
² Na waseme hivi waliokombolewa na Bwana, Wale aliowakomboa na mkono wa mtesi.
³ Akawakusanya kutoka nchi zote, Mashariki na magharibi, kaskazini na kusini.
⁴ Walitanga-tanga jangwani katika njia ya nyika; Hawakuona mji wa kukaa.
⁵ Waliona njaa, waliona na kiu, Nafsi yao ilikuwa ikizimia ndani yao.
⁶ Wakamlilia Bwana katika dhiki zao, Akawaponya na shida zao.
⁷ Akawaongoza kwa njia ya kunyoka, Wapate kwenda mpaka mji wa kukaa.
⁸ Na wamshukuru Bwana, kwa fadhili zake, Na maajabu yake kwa wanadamu.
⁹ Maana hushibisha nafsi yenye shauku, Na nafsi yenye njaa huijaza mema.
¹⁰ Waliokaa katika giza na uvuli wa mauti, Wamefungwa katika taabu na chuma,
¹¹ Kwa sababu waliyaasi maneno ya Mungu, Wakalidharau shauri lake Aliye juu.
¹² Hata akawadhili moyo kwa taabu, Wakajikwaa wala hakuna msaidizi.
¹³ Wakamlilia Bwana katika dhiki zao, Akawaponya na shida zao.
¹⁴ Aliwatoa katika giza na uvuli wa mauti, Akayavunja mafungo yao.
¹⁵ Na wamshukuru Bwana kwa fadhili zake, Na maajabu yake kwa wanadamu.
¹⁶ Maana ameivunja milango ya shaba, Ameyakata mapingo ya chuma.
¹⁷ Wapumbavu, kwa sababu ya ukosaji wao, Na kwa sababu ya maovu yao, hujitesa.
¹⁸ Nafsi zao zachukia kila namna ya chakula, Wameyakaribia malango ya mauti.
¹⁹ Wakamlilia Bwana katika dhiki zao, Akawaponya na shida zao.
²⁰ Hulituma neno lake, huwaponya, Huwatoa katika maangamizo yao.
²¹ Na wamshukuru Bwana kwa fadhili zake, Na maajabu yake kwa wanadamu.
²² Na wamtolee dhabihu za kushukuru, Na kuyasimulia matendo yake kwa kuimba.
²³ Washukao baharini katika merikebu, Wafanyao kazi yao katika maji mengi,
²⁴ Hao huziona kazi za Bwana, Na maajabu yake vilindini.
²⁵ Maana husema, akavumisha upepo wa dhoruba, Ukayainua juu mawimbi yake.
²⁶ Wapanda mbinguni, watelemka vilindini, Nafsi yao yayeyuka kwa hali mbaya.
²⁷ Wayumba-yumba, wapepesuka kama mlevi, Akili zao zote zawapotea.
²⁸ Wakamlilia Bwana katika dhiki zao, Akawaponya na shida zao.
²⁹ Huituliza dhoruba, ikawa shwari, Mawimbi yake yakanyamaza.
³⁰ Ndipo walipofurahi kwa kuwa yametulia Naye huwaleta mpaka bandari waliyoitamani.
³¹ Na wamshukuru Bwana kwa fadhili zake, Na maajabu yake kwa wanadamu.
³² Na wamtukuze katika kusanyiko la watu, Na wamhimidi katika baraza ya wazee.
³³ Amegeuza mito ikawa jangwa, Na chemchemi za maji zikawa nchi ya kiu.
³⁴ Nchi ya matunda mengi ikawa uwanda wa chumvi, Kwa sababu ya ubaya wao walioikaa.
³⁵ Amegeuza jangwa ikawa ziwa la maji, Na nchi kavu ikawa chemchemi za maji.
³⁶ Maana amewakalisha huko wenye njaa, Nao wametengeneza mji wa kukaa.
³⁷ Wakapanda mbegu katika mashamba, Na kutia mizabibu iliyotoa matunda yake.
³⁸ Naye huwabariki wakaongezeka sana, Wala hayapunguzi makundi yao.
³⁹ Kisha wakapungua na kudhilika, Kwa kuonewa na mabaya na huzuni.
⁴⁰ Akawamwagia wakuu dharau, Na kuwazungusha katika nyika isiyo na njia.
⁴¹ Akamweka mhitaji juu mbali na mateso, Akamfanyia jamaa kama kundi la kondoo.
⁴² Wanyofu wa moyo wataona na kufurahi, Na uovu wa kila namna utajifumba kinywa.
⁴³ Aliye na hekima na ayaangalie hayo; Na wazitafakari fadhili za Bwana.