Marc 3.28
Bible en Swahili de l’est

¹ Akaingia tena katika sinagogi; na palikuwako huko mtu mwenye mkono uliopooza;
² wakamvizia ili kuona kama atamponya siku ya sabato; wapate kumshitaki.
³ Akamwambia yule mtu mwenye mkono uliopooza, Simama katikati.
⁴ Akawauliza, Ni halali siku ya sabato kutenda mema, au kutenda mabaya? Kuponya roho au kuiua? Wakanyamaza.
⁵ Akawakazia macho pande zote kwa hasira, akiona huzuni kwa ajili ya ugumu wa mioyo yao, akamwambia yule mtu, Nyosha mkono wako. Naye akaunyosha; mkono wake ukawa mzima tena.
⁶ Mara wakatoka wale Mafarisayo, wakawa wakifanya shauri juu yake pamoja na Maherodi, jinsi ya kumwangamiza.
⁷ Naye Yesu akajitenga, yeye na wanafunzi wake, akaenda baharini. Mkutano mkuu ukamfuata, kutoka Galilaya, na Uyahudi,
⁸ na Yerusalemu, na Idumaya, na ng’ambo ya Yordani, na pande za Tiro na Sidoni, mkutano mkuu, waliposikia habari za mambo yote aliyokuwa akiyatenda, wakamwendea.
⁹ Akawaambia wanafunzi wake ya kwamba chombo kidogo kikae karibu naye, kwa sababu ya mkutano, wasije wakamsonga.
¹⁰ Maana aliponya wengi, hata wote waliokuwa na misiba wakamrukia wapate kumgusa.
¹¹ Na pepo wachafu, kila walipomwona, walianguka mbele yake, wakalia wakisema, Wewe ndiwe Mwana wa Mungu.
¹² Akawakataza sana, wasimdhihirishe.

Choix des douze apôtres

¹³ Akapanda mlimani, akawaita aliowataka mwenyewe; wakamwendea.
¹⁴ Akaweka watu kumi na wawili, wapate kuwa pamoja naye, na kwamba awatume kuhubiri,
¹⁵ tena wawe na amri ya kutoa pepo.
¹⁶ Akawaweka wale Thenashara; na Simoni akampa jina la Petro;
¹⁷ na Yakobo, mwana wa Zebedayo, na Yohana nduguye Yakobo, akawapa jina la Boanerge, maana yake, wana wa ngurumo;
¹⁸ na Andrea, na Filipo, na Bartholomayo, na Mathayo, na Tomaso, na Yakobo wa Alfayo, na Thadayo, na Simoni Mkananayo,
¹⁹ na Yuda Iskariote, ndiye aliyemsaliti. Kisha akaingia nyumbani.

Jésus contesté

²⁰ Mkutano wakakusanyika tena, hata wao wenyewe wasiweze hata kula mkate.
²¹ Jamaa zake walipopata habari wakatoka kwenda kumkamata; maana walisema, Amerukwa na akili.
²² Nao waandishi walioshuka kutoka Yerusalemu wakasema, Ana Beelzebuli, na, Kwa mkuu wa pepo huwatoa pepo.
²³ Akawaita, akawaambia kwa mifano, Awezaje Shetani kumtoa Shetani?
²⁴ Na ufalme ukifitinika juu ya nafsi yake, ufalme huo hauwezi kusimama;
²⁵ na nyumba ikifitinika juu ya nafsi yake, nyumba hiyo haiwezi kusimama.
²⁶ Na kama Shetani ameondoka juu ya nafsi yake, akafitinika, hawezi kusimama, bali huwa na kikomo.
²⁷ Hawezi mtu kuingia ndani ya nyumba ya mtu mwenye nguvu, na kuviteka vitu vyake, asipomfunga kwanza yule mwenye nguvu; ndipo atakapoiteka nyumba yake.
²⁸ Amin, nawaambia, Dhambi zote watasamehewa wanadamu, na kufuru zao watakazokufuru zote;
²⁹ bali mtu atakayemkufuru Roho Mtakatifu hana msamaha hata milele; ila atakuwa ana dhambi ya milele,
³⁰ kwa vile walivyosema, Ana pepo mchafu.
³¹ Wakaja mamaye na nduguze; wakasimama nje, wakatuma mtu kumwita.
³² Na makutano walikuwa wameketi, wakimzunguka, wakamwambia, Tazama, mama yako na ndugu zako wako nje, wanakutafuta.
³³ Akawajibu, akisema, Mama yangu na ndugu zangu ni akina nani?
³⁴ Akawatazama wale walioketi wakimzunguka pande zote, akasema, Tazama, mama yangu na ndugu zangu!
³⁵ Kwa maana mtu ye yote atakayeyafanya mapenzi ya Mungu, huyo ndiye ndugu yangu, na umbu langu, na mama yangu.