Marc 15.21
Bible en Swahili de l’est

Jésus devant le gouverneur romain

¹ Mara kulipokuwa asubuhi wakuu wa makuhani walifanya shauri pamoja na wazee na waandishi na baraza nzima, wakamfunga Yesu, wakamchukua, wakamleta mbele ya Pilato.
² Pilato akamwuliza, Wewe ndiwe mfalme wa Wayahudi? Akajibu, akamwambia, Wewe wasema.
³ Nao wakuu wa makuhani walikuwa wakimshitaki mambo mengi.
⁴ Pilato akamwuliza tena akisema, Hujibu neno? Tazama ni mambo mangapi wanayokushitaki!
⁵ Wala Yesu hakujibu neno tena, hata Pilato akastaajabu.
⁶ Basi wakati wa sikukuu huwafungulia mfungwa mmoja, wamwombaye.
⁷ Palikuwa na mtu aitwaye Baraba, amefungwa pamoja na watu waliofanya fitina, na kufanya uuaji katika fitina ile.
⁸ Makutano wakaja, wakaanza kuomba awafanyie kama vile alivyozoea.
⁹ Pilato akawajibu, akisema, Je! Mnataka niwafungulie mfalme wa Wayahudi?
¹⁰ Kwa maana alitambua ya kuwa wakuu wa makuhani wamemtoa kwa husuda.
¹¹ Lakini wakuu wa makuhani wakawataharakisha makutano, kwamba afadhali awafungulie Baraba.
¹² Pilato akajibu tena akawaambia, Basi nimtendeje huyu mnayemnena kuwa ni mfalme wa Wayahudi?
¹³ Wakapiga kelele tena, Msulibishe.
¹⁴ Pilato akawaambia, Kwani, ni ubaya gani alioutenda? Wakazidi sana kupiga kelele, Msulibishe.
¹⁵ Pilato akipenda kuwaridhisha makutano, akawafungulia Baraba; akamtoa Yesu, baada ya kumpiga mijeledi, ili asulibiwe.
¹⁶ Nao askari wakamchukua ndani ya behewa, ndiyo Praitorio (yaani, nyumba ya uliwali), wakakusanya pamoja kikosi kizima.
¹⁷ Wakamvika vazi la rangi ya zambarau, wakasokota taji ya miiba, wakamtia kichwani;
¹⁸ wakaanza kumsalimu, Salamu, Mfalme wa Wayahudi!
¹⁹ Wakampiga mwanzi wa kichwa, wakamtemea mate, wakapiga magoti, wakamsujudia.
²⁰ Hata wakiisha kumdhihaki, wakamvua lile vazi la rangi ya zambarau, wakamvika mavazi yake mwenyewe; wakamchukua nje ili wamsulibishe.

Crucifixion et mort de Jésus

²¹ Wakamshurutisha mtu aliyekuwa akipita, akitoka mashamba, Simoni Mkirene, baba yao Iskanda na Rufo, ili auchukue msalaba wake.
²² Wakamleta mpaka mahali paitwapo Golgotha, yaani, Fuvu la kichwa.
²³ Wakampa mvinyo iliyotiwa manemane, asiipokee.
²⁴ Wakamsulibisha, wakagawa mavazi yake, wakayapigia kura kila mtu atwae nini.
²⁵ Basi ilikuwa saa tatu, nao wakamsulibisha.
²⁶ Palikuwa na anwani ya mashitaka yake iliyoandikwa juu, MFALME WA WAYAHUDI.
²⁷ Na pamoja naye walisulibisha wanyang’anyi wawili, mmoja mkono wake wa kuume na mmoja mkono wake wa kushoto. [
²⁸ Basi andiko likatimizwa linenalo, Alihesabiwa pamoja na waasi.]
²⁹ Nao waliokuwa wakipita njiani wakamtukana, wakitikisa-tikisa vichwa, wakisema, Ahaa! Wewe mwenye kulivunja hekalu na kulijenga katika siku tatu,
³⁰ jiponye nafsi yako, ushuke msalabani.
³¹ Kadhalika na wakuu wa makuhani wakamdhihaki wao kwa wao, pamoja na waandishi, wakisema, Aliponya wengine; hawezi kujiponya mwenyewe.
³² Kristo, mfalme wa Israeli, na ashuke sasa msalabani tupate kuona na kuamini. Hata wale waliosulibiwa pamoja naye wakamfyolea.
³³ Na ilipokuwa saa sita, palikuwa na giza juu ya nchi yote, hata saa tisa.
³⁴ Na saa tisa Yesu akapaza sauti yake kwa nguvu, Eloi, Eloi, lama sabakthani? Maana yake, Mungu wangu, Mungu wangu, mbona umeniacha?
³⁵ Na baadhi yao waliosimama pale, walisema, Tazama, anamwita Eliya.
³⁶ Na mmoja akaenda mbio, akajaza sifongo siki, akaitia juu ya mwanzi, akamnywesha, akisema, Acheni, na tuone kwamba Eliya anakuja kumtelemsha.
³⁷ Naye Yesu akatoa sauti kuu, akakata roho.
³⁸ Pazia la hekalu likapasuka vipande viwili toka juu hata chini.
³⁹ Basi yule akida, aliyesimama hapo akimwelekea, alipoona ya kuwa alikata roho jinsi hii, akasema, Hakika mtu huyu alikuwa Mwana wa Mungu.
⁴⁰ Palikuwako na wanawake wakitazama kwa mbali; miongoni mwao alikuwamo Mariamu Magdalene, na Mariamu mama yao Yakobo mdogo na Yose, na Salome;
⁴¹ hao ndio waliofuatana naye huko Galilaya, na kumtumikia; na wengine wengi waliopanda pamoja naye mpaka Yerusalemu.

Mise au tombeau du corps de Jésus

⁴² Hata ikiisha kuwa jioni, kwa sababu ni Maandalio, ndiyo siku iliyo kabla ya sabato,
⁴³ akaenda Yusufu, mtu wa Arimathaya, mstahiki, mtu wa baraza ya mashauri, naye mwenyewe anautazamia ufalme wa Mungu; akafanya ujasiri, akaingia mbele ya Pilato akauomba mwili wake Yesu.
⁴⁴ Lakini Pilato akastaajabu, kwamba amekwisha kufa. Akamwita yule akida, akamwuliza kwamba amekufa kitambo.
⁴⁵ Hata alipokwisha kupata hakika kwa yule akida, alimpa Yusufu yule maiti.
⁴⁶ Naye akanunua sanda ya kitani, akamtelemsha, akamfungia ile sanda, akamweka katika kaburi lililochongwa mwambani; akavingirisha jiwe mbele ya mlango wa kaburi.
⁴⁷ Nao Mariamu Magdalene na Mariamu mamaye Yose wakapatazama mahali alipowekwa.