Matthieu 15.35
Bible en Swahili de l’est

Le cœur humain

¹ Ndipo Mafarisayo na waandishi toka Yerusalemu walipomwendea Yesu wakisema,
² Mbona wanafunzi wako huyahalifu mapokeo ya wazee, kwa maana hawanawi mikono walapo chakula.
³ Akajibu, akawaambia, Mbona ninyi nanyi huihalifu amri ya Mungu kwa ajili ya mapokeo yenu?
⁴ Kwa kuwa Mungu alisema, Mheshimu baba yako na mama yako, na Amtukanaye baba yake au mama yake kufa na afe.
⁵ Bali ninyi husema, Atakayemwambia babaye au mamaye, Cho chote kikupasacho kusaidiwa na mimi ni wakfu,
⁶ basi asimheshimu baba yake au mama yake. Mkalitangua neno la Mungu kwa ajili ya mapokeo yenu.
⁷ Enyi wanafiki, ni vema alivyotabiri Isaya kwa habari zenu, akisema,
⁸ Watu hawa huniheshimu kwa midomo; Ila mioyo yao iko mbali nami.
⁹ Nao waniabudu bure, Wakifundisha mafundisho Yaliyo maagizo ya wanadamu.
¹⁰ Akawaita makutano akawaambia
¹¹ Sikilizeni, mfahamu; Sicho kiingiacho kinywani kimtiacho mtu unajisi; bali kitokacho kinywani ndicho kimtiacho mtu unajisi.
¹² Ndipo wanafunzi wake walipomwendea, wakamwambia, Wajua ya kuwa Mafarisayo walipolisikia neno lile walichukizwa?
¹³ Akajibu, akasema, Kila pando asilolipanda Baba yangu wa mbinguni litang’olewa.
¹⁴ Waacheni; hao ni viongozi vipofu wa vipofu. Na kipofu akimwongoza kipofu mwenzake, watatumbukia shimoni wote wawili.
¹⁵ Basi Petro akajibu, akamwambia, Tueleze mfano huo.
¹⁶ Yesu akasema, Hata sasa ninyi nanyi mngali hamna akili?
¹⁷ Hamjafahamu bado ya kuwa kila kiingiacho kinywani hupita tumboni, kikatupwa chooni?
¹⁸ Bali vitokavyo kinywani vyatoka moyoni; navyo ndivyo vimtiavyo mtu unajisi.
¹⁹ Kwa maana moyoni hutoka mawazo mabaya, uuaji, uzinzi, uasherati; wivi, ushuhuda wa uongo, na matukano;
²⁰ hayo ndiyo yamtiayo mtu unajisi; lakini kula kabla hajanawa mikono hakumtii mtu unajisi.

Jésus et la femme non juive

²¹ Yesu akaondoka huko, akaenda kando pande za Tiro na Sidoni.
²² Na tazama, mwanamke Mkananayo wa mipaka ile akatokea, akampazia sauti akisema, Unirehemu, Bwana, Mwana wa Daudi; binti yangu amepagawa sana na pepo.
²³ Wala yeye hakumjibu neno. Nao wanafunzi wake wakamwendea, wakamwomba, wakisema, Mwache aende zake; kwa maana anapiga kelele nyuma yetu.
²⁴ Akajibu, akasema, Sikutumwa ila kwa kondoo waliopotea wa nyumba ya Israeli.
²⁵ Naye akaja akamsujudia, akisema Bwana, unisaidie.
²⁶ Akajibu, akasema, Si vema kukitwaa chakula cha watoto na kuwatupia mbwa.
²⁷ Akasema, Ndiyo, Bwana, lakini hata mbwa hula makombo yaangukayo mezani pa bwana zao.
²⁸ Ndipo Yesu akajibu, akamwambia, Mama, imani yako ni kubwa; na iwe kwako kama utakavyo. Akapona binti yake tangu saa ile.
²⁹ Yesu akaondoka huko, akafika kando ya bahari ya Galilaya; akapanda mlimani, akaketi huko.
³⁰ Wakamwendea makutano mengi wakimletea viwete, vipofu, mabubu, vilema, na wengine wengi, wakawaweka miguuni pake; akawaponya;
³¹ hata ule mkutano wakastaajabu, walipowaona mabubu wanasema, vilema wanakuwa wazima, viwete wanakwenda, na vipofu wanaona; wakamtukuza Mungu wa Israeli.

Multiplication des pains pour quatre mille hommes

³² Yesu akawaita wanafunzi wake, akasema, Nawahurumia mkutano, kwa kuwa yapata siku tatu wamekaa pamoja nami, wala hawana kitu cha kula, tena kuwaaga wakifunga sipendi, wasije wakazimia njiani.
³³ Wanafunzi wake wakamwambia, Tupate wapi mikate mingi hapa nyikani, hata kushibisha mkutano mkuu namna hii?
³⁴ Yesu akawaambia, Mnayo mikate mingapi? Wakasema, Saba, na visamaki vichache.
³⁵ Akawaagiza mkutano waketi chini;
³⁶ akaitwaa ile mikate saba na vile visamaki, akashukuru akavimega, akawapa wanafunzi wake, nao wanafunzi wakawapa makutano.
³⁷ Wakala wote wakashiba; wakayaokota masazo ya vipande vya mikate makanda saba, yamejaa.
³⁸ Nao waliokula walikuwa wanaume elfu nne, bila wanawake na watoto.
³⁹ Akawaaga makutano, akapanda chomboni, akaenda pande za Magadani.