Marc 7.22
Bible en Swahili de l’est

¹ Kisha Mafarisayo, na baadhi ya waandishi waliotoka Yerusalemu, wakakusanyika mbele yake, ² wakaona wengine katika wanafunzi wake wakila vyakula kwa mikono najisi, yaani, isiyonawiwa. ³ Kwa maana Mafarisayo na Wayahudi wote wasiponawa mikono mpaka kiwiko, hawali, wakishika mapokeo ya wazee wao; ⁴ tena wakitoka sokoni, wasipotawadha, hawali; na yako mambo mengine waliyopokea kuyashika, kama kuosha vikombe, na midumu, na vyombo vya shaba. ⁵ Basi wale Mafarisayo na waandishi wakamwuliza, Mbona wanafunzi wako hawaendi kwa kuyafuata mapokeo ya wazee, bali hula chakula kwa mikono najisi? ⁶ Akawaambia, Isaya alitabiri vema juu yenu ninyi wanafiki, kama ilivyoandikwa, Watu hawa huniheshimu kwa midomo Ila mioyo yao iko mbali nami; ⁷ Nao waniabudu bure, Wakifundisha mafundisho Yaliyo maagizo ya wanadamu, ⁸ Ninyi mwaiacha amri ya Mungu, na kuyashika mapokeo ya wanadamu. ⁹ Akawaambia, Vema! Mwaikataa amri ya Mungu mpate kuyashika mapokeo yenu. ¹⁰ Maana Musa alisema, Waheshimu baba yako na mama yako, na, Amtukanaye babaye au mamaye kufa na afe. ¹¹ Bali ninyi husema, Mtu akimwambia babaye au mamaye, Ni Korbani, yaani, wakfu, kitu changu cho chote kikupasacho kufaidiwa nacho, huwa basi; ¹² wala hammruhusu baada ya hayo kumtendea neno babaye au mamaye; ¹³ huku mkilitangua neno la Mungu kwa mapokeo yenu mliyopokeana; tena mwafanya mambo mengi yaliyo sawasawa na hayo. ¹⁴ Akawaita makutano tena, akawaambia, Nisikieni nyote na kufahamu. ¹⁵ Hakuna kitu kilicho nje ya mtu ambacho kikimwingia chaweza kumtia unajisi, bali vile vimtokavyo, ndivyo vimtiavyo unajisi yule mtu. ¹⁶ Mtu akiwa na masikio ya kusikilia, na asikie.] ¹⁷ Hata alipoingia nyumbani, ameuacha mkutano, wanafunzi wake wakamwuliza habari za ule mfano. ¹⁸ Akawaambia, Hivi hata ninyi hamna akili? Hamfahamu ya kwamba kila kitu kilicho nje ya mtu, kikimwingia, hakiwezi kumtia unajisi; ¹⁹ kwa sababu hakimwingii moyoni, ila tumboni tu; kisha chatoka kwenda chooni? Kwa kusema hivi alivitakasa vyakula vyote. ²⁰ Akasema, Kimtokacho mtu ndicho kimtiacho unajisi. ²¹ Kwa maana ndani ya mioyo ya watu hutoka mawazo mabaya, uasherati, ²² wivi, uuaji, uzinzi, tamaa mbaya, ukorofi, hila, ufisadi, kijicho, matukano, kiburi, upumbavu. ²³ Haya yote yaliyo maovu yatoka ndani, nayo yamtia mtu unajisi. ²⁴ Akaondoka huko, akaenda zake hata mipaka ya Tiro na Sidoni. Akaingia katika nyumba, akataka isijulikane na mtu; lakini hakuweza kusitirika. ²⁵ Ila mara mwanamke, ambaye binti yake yuna pepo mchafu, alisikia habari zake, akaja akamwangukia miguuni pake. ²⁶ Na yule mwanamke ni Myunani, kabila yake ni Msirofoinike. Akamwomba amtoe pepo katika binti yake. ²⁷ Akamwambia, Waache watoto washibe kwanza; maana si vizuri kukitwaa chakula cha watoto, na kuwatupia mbwa. ²⁸ Naye akajibu, akamwambia, Naam, Bwana, lakini hata mbwa walio chini ya meza hula makombo ya watoto. ²⁹ Akamwambia, Kwa sababu ya neno hilo, enenda zako, pepo amemtoka binti yako. ³⁰ Akaenda zake nyumbani kwake, akamkuta yule kijana amelazwa kitandani, na yule pepo amekwisha kumtoka. ³¹ Akatoka tena katika mipaka ya Tiro, akapita katikati ya Sidoni, akaenda mpaka bahari ya Galilaya, kati ya mipaka ya Dekapoli. ³² Wakamletea kiziwi, naye ni mwenye utasi, wakamsihi amwekee mikono. ³³ Akamtenga na mkutano faraghani, akatia vidole vyake masikioni mwake, akatema mate, akamgusa ulimi, ³⁴ akatazama juu mbinguni, akaugua, akamwambia, Efatha, maana yake, Funguka. ³⁵ Mara masikio yake yakafunguka, kifungo cha ulimi wake kikalegea, akasema vizuri. ³⁶ Akawaonya wasimwambie mtu; lakini kadiri ya alivyozidi kuwaagiza, ndivyo walivyozidi kutangaza habari; ³⁷ wakashangaa mno kupita kiasi, wakinena, Ametenda mambo yote vema; viziwi awafanya wasikie, na bubu waseme.