Luc 20.16
Bible en Swahili de l’est

¹ Ikawa siku moja, alipokuwa akiwafundisha watu hekaluni, na kuihubiri habari njema, wakuu wa makuhani na waandishi pamoja na wazee walimtokea ghafula;
² wakamwambia, wakisema, Tuambie, unatenda mambo hayo kwa mamlaka gani? Tena, ni nani aliyekupa mamlaka hii?
³ Akajibu akawaambia, Nami nitawauliza ninyi neno moja; niambieni,
⁴ Ubatizo wa Yohana, je! Ulitoka mbinguni au kwa wanadamu?
⁵ Wakahojiana wao kwa wao, wakisema, Kama tukisema ulitoka mbinguni, atasema, Basi, mbona hamkumwamini?
⁶ Na tukisema ulitoka kwa wanadamu, watu wote watatupiga kwa mawe, kwa kuwa wamemkubali Yohana kuwa ni nabii.
⁷ Wakajibu, kwamba, Hatujui ulikotoka.
⁸ Yesu akawaambia, Wala mimi siwaambii ninyi ni kwa mamlaka gani ninatenda mambo haya.

Parabole des vignerons

⁹ Akaanza kuwaambia watu mfano huu; Mtu mmoja alipanda shamba la mizabibu; akapangisha wakulima, akaenda akakaa katika nchi nyingine muda mrefu.
¹⁰ Na wakati wa mavuno alituma mtumwa kwa wale wakulima ili wampe baadhi ya matunda ya mizabibu; wakulima wakampiga wakamfukuza mikono mitupu.
¹¹ Akatuma na mtumwa mwingine. Wakampiga huyu naye, wakamwaibisha wakamfukuza mikono mitupu.
¹² Akamtuma na wa tatu; huyu naye wakamtia jeraha, wakamtupa nje.
¹³ Basi, bwana wa shamba la mizabibu alisema, Nifanyeje? Nitamtuma mwanangu, mpendwa wangu; yamkini watamheshimu yeye.
¹⁴ Lakini, wale wakulima walipomwona, walishauriana wao kwa wao, wakisema, Huyu ndiye mrithi; haya, na tumwue, ili urithi uwe wetu.
¹⁵ Wakamtupa nje ya shamba la mizabibu, wakamwua. Basi, bwana wa shamba la mizabibu atawatendeje?
¹⁶ Atakuja na kuwaangamiza wakulima wale, na lile shamba la mizabibu atawapa wengine. Waliposikia hayo walisema, Hasha! Yasitukie haya!
¹⁷ Akawakazia macho akasema, Maana yake nini basi neno hili lililoandikwa, Jiwe walilolikataa waashi, Hilo limekuwa jiwe kuu la pembeni?
¹⁸ Kila mtu aangukaye juu ya jiwe hilo atavunjika-vunjika; na ye yote ambaye litamwangukia litamsaga kabisa.
¹⁹ Nao waandishi na wakuu wa makuhani walitafuta kumkamata saa iyo hiyo, wakawaogopa watu, maana walitambua ya kwamba mfano huu amewanenea wao.

Tentatives de piéger Jésus

²⁰ Wakamvizia-vizia, wakatuma wapelelezi waliojifanya kuwa watu wa haki, ili wamnase katika maneno yake, wapate kumtia katika enzi na mamlaka ya liwali.
²¹ Wakamwuliza, wakisema, Mwalimu, twajua ya kwamba wasema na kufundisha yaliyo ya haki, wala hujali cheo cha mtu, bali unafundisha njia ya Mungu kwa kweli.
²² Je! Ni halali tumpe Kaisari kodi, au sivyo?
²³ Lakini yeye alitambua hila yao, akawaambia,
²⁴ Nionyesheni dinari. Ina sura na anwani ya nani? Wakamjibu, Ya Kaisari.
²⁵ Akawaambia, Basi, vya Kaisari mpeni Kaisari, na vya Mungu mpeni Mungu.
²⁶ Wala hawakuweza kumshitaki kwa maneno yake mbele ya watu; wakastaajabia majibu yake, wakanyamaa.
²⁷ Kisha baadhi ya Masadukayo wakamwendea, wale wasemao ya kwamba hakuna ufufuo, wakamwuliza,
²⁸ wakisema, Mwalimu, Musa alituandikia ya kuwa, mtu akifiwa na ndugu yake mwenye mke, lakini hana mtoto na amtwae huyu mke, ampatie ndugu yake mzao.
²⁹ Basi, kulikuwa na ndugu saba. Wa kwanza alioa mke, akafa hana mtoto;
³⁰ na wa pili [akamtwaa yule mke, akafa hana mtoto;]
³¹ hata wa tatu akamwoa, na kadhalika wote saba, wakafa, wasiache watoto.
³² Mwisho akafa yule mke naye.
³³ Basi, katika ufufuo atakuwa mke wa yupi? Maana aliolewa na wote saba.
³⁴ Yesu akawaambia, Wana wa ulimwengu huu huoa na kuolewa;
³⁵ lakini, wale wahesabiwao kuwa wamestahili kuupata ulimwengu ule, na kule kufufuka katika wafu, hawaoi wala hawaolewi;
³⁶ wala hawawezi kufa tena; kwa sababu huwa sawasawa na malaika, nao ni wana wa Mungu, kwa vile walivyo wana wa ufufuo.
³⁷ Lakini, ya kuwa wafu hufufuliwa, hata na Musa alionyesha katika sura ya Kijiti, hapo alipomtaja Bwana kuwa ni Mungu wa Ibrahimu, na Mungu wa Isaka, na Mungu wa Yakobo.
³⁸ Naye si Mungu wa wafu, bali wa walio hai; kwa kuwa wote huishi kwake.
³⁹ Waandishi wengine wakajibu wakamwambia, Mwalimu, umesema vema;
⁴⁰ wala hawakuthubutu kumwuliza neno baada ya hayo.

Reproches de Jésus aux chefs religieux

⁴¹ Akawaambia, Wasemaje watu kwamba Kristo ni Mwana wa Daudi?
⁴² Maana, Daudi mwenyewe asema katika chuo cha Zaburi, Bwana alimwambia Bwana wangu, Uketi mkono wangu wa kuume,
⁴³ Hata niwaweke adui zako Kuwa kiti cha kuwekea miguu yako.
⁴⁴ Basi Daudi amwita Bwana; amekuwaje mwana wake?
⁴⁵ Na watu wote walipokuwa wakimsikiliza, aliwaambia wanafunzi wake,
⁴⁶ Jilindeni na waandishi, wapendao kutembea wamevaa mavazi marefu, na kusalimiwa masokoni, na kuketi mbele katika masinagogi, na viti vya mbele karamuni.
⁴⁷ Wanakula nyumba za wajane, na kwa unafiki husali sala ndefu. Hao watapata hukumu iliyo kuu.