1 Chroniques 16.8
Bible en Swahili de l’est

Organisation du service du tabernacle

¹ Wakaliingiza sanduku la Mungu, na kuliweka katikati ya hema aliyoipiga Daudi kwa ajili yake; wakatoa sadaka za kuteketezwa na sadaka za amani mbele za Mungu.
² Na Daudi alipokwisha kuitoa sadaka ya kuteketezwa na sadaka za amani, akawabariki watu kwa jina la Bwana.
³ Kisha akawagawia kila mtu wa Israeli, waume kwa wake, kila mtu mkate wa ngano, na kipande cha nyama, na mkate wa zabibu.
⁴ Akawaagiza baadhi ya Walawi kwamba watumike mbele ya sanduku la Bwana, wamfanyie ukumbusho, na shukrani, na sifa, Bwana, Mungu wa Israeli;
⁵ Asafu mkuu wao, na wa pili wake Zekaria, na Yeieli, na Shemiramothi, na Yehieli, na Matithiya, na Eliabu, na Benaya, na Obed-edomu, na Yeieli, wenye vinanda na vinubi; naye Asafu mwenye kupiga matoazi;
⁶ nao makuhani Benaya na Yahazieli wenye baragumu daima, mbele ya sanduku la agano la Mungu.
⁷ Ndipo siku hiyo Daudi alipoagiza kwanza kumshukuru Bwana, kwa mkono wa Asafu na nduguze.
⁸ Mshukuruni Bwana, liitieni jina lake; Wajulisheni watu matendo yake.
⁹ Mwimbieni, mwimbieni kwa zaburi; Zitafakarini ajabu zake zote.
¹⁰ Jisifuni kwa jina lake takatifu; Na ufurahi moyo wao wamtafutao Bwana.
¹¹ Mtakeni Bwana na nguvu zake; Utafuteni uso wake siku zote.
¹² Zikumbukeni ajabu zake alizozifanya; Miujiza yake na hukumu za kinywa chake;
¹³ Enyi wazao wa Israeli, mtumishi wake, Enyi wana wa Yakobo, wateule wake.
¹⁴ Yeye, Bwana, ndiye Mungu wetu; Duniani mwote mna hukumu zake.
¹⁵ Likumbukeni agano lake milele, Neno lile aliloviamuru vizazi elfu.
¹⁶ Agano alilofanya na Ibrahimu, Na uapo wake kwa Isaka;
¹⁷ Alilomthibitishia Yakobo kuwa amri, Na Israeli liwe agano la milele.
¹⁸ Akisema, Nitakupa wewe nchi ya Kanaani, Iwe urithi wenu mliopimiwa;
¹⁹ Mlipokuwa watu wawezao kuhesabiwa; Naam, watu wachache na wageni ndani yake.
²⁰ Wakatanga-tanga toka taifa hata taifa, Toka ufalme mmoja hata kwa watu wengine.
²¹ Hakumwacha mtu awaonee; Hata wafalme aliwakemea kwa ajili yao;
²² Akisema, Msiwaguse masihi wangu, Wala msiwadhuru nabii zangu.
²³ Mwimbieni Bwana, nchi yote; Tangazeni wokovu wake siku kwa siku.
²⁴ Wahubirini mataifa habari za utukufu wake, Na watu wote habari za maajabu yake.
²⁵ Kwa kuwa Bwana ni mkuu mwenye kusifiwa sana; Na wa kuhofiwa kuliko miungu yote.
²⁶ Maana miungu yote ya watu si kitu; Lakini Bwana ndiye aliyezifanya mbingu.
²⁷ Heshima na adhama ziko mbele zake; Nguvu na furaha zipo mahali pake.
²⁸ Mpeni Bwana, enyi jamaa za watu, Mpeni Bwana utukufu na nguvu.
²⁹ Mpeni Bwana utukufu wa jina lake; Leteni sadaka, mje mbele zake; Mwabuduni Bwana kwa uzuri wa utakatifu;
³⁰ Tetemekeni mbele zake, nchi yote.
³¹ Mbingu na zifurahi, nchi na ishangilie; Na waseme katika mataifa, Bwana ametamalaki;
³² Bahari na ivume na vyote viijazavyo; Mashamba na yashangilie na vyote vilivyomo;
³³ Ndipo miti yote ya mwituni iimbe kwa furaha,
³⁴ Mshukuruni Bwana kwa kuwa ni mwema; Kwa maana fadhili zake ni za milele.
³⁵ Nanyi mkaseme, Ee Mungu wa wokovu wetu, utuokoe, Utukusanye kwa kututoa katika mataifa, Tulishukuru jina lako takatifu, Tuzifanyie shangwe sifa zako.
³⁶ Na ahimidiwe Bwana, Mungu wa Israeli, tangu milele hata milele. Na watu wote wakasema, Amina; wakamhimidi Bwana.
³⁷ Basi akawaacha huko, mbele ya sanduku la agano la Bwana, Asafu na nduguze, ili watumike mbele ya sanduku daima, kila siku kama ilivyokuwa kazi yake.
³⁸ Naye Obed-edomu, pamoja na ndugu zao, sitini na wanane; Obed-edomu na mwana wa Yeduthuni, na Hosa, wawe mabawabu;
³⁹ na Sadoki kuhani, na nduguze makuhani, mbele ya maskani ya Bwana katika mahali pa juu palipokuwa huko Gibeoni,
⁴⁰ ili kumtolea Bwana sadaka za kuteketezwa juu ya madhabahu ya sadaka ya kuteketezwa daima asubuhi na jioni, naam, sawasawa na yote yaliyoandikwa katika torati ya Bwana, aliyowaamuru Israeli;
⁴¹ na pamoja nao Hemani na Yeduthuni, na wale wengine waliochaguliwa, waliotajwa majina yao, ili kumshukuru Bwana, kwa kuwa fadhili zake ni za milele;
⁴² na pamoja nao Hemani na Yeduthuni wenye baragumu na matoazi, kwa hao watakaovumisha sauti, na vinanda kwa ajili ya hizo nyimbo za Mungu; na hao wana wa Yeduthuni wawepo mlangoni.
⁴³ Kisha watu wote wakaenda zao kila mtu nyumbani kwake; naye Daudi akarudi ili awabariki watu wa nyumbani mwake.