Job 34
Bible en Swahili de l’est

¹ Tena Elihu akajibu na kusema, ² Sikilizeni maneno yangu, enyi wenye hekima; Tegeni masikio kwangu, ninyi mlio na maarifa. ³ Kwa kuwa sikio huyajaribu maneno, Kama vile kaakaa lionjavyo chakula. ⁴ Na tujichagulie yaliyo ya uelekevu; Na tujue wenyewe yaliyo mema. ⁵ Kwani Ayubu amesema, Mimi ni mwenye haki, Naye Mungu ameniondolea haki yangu; ⁶ Nijapokuwa mwenye haki, nimehesabiwa kuwa mwongo; Jeraha yangu haiponyeki, nijapokuwa sina makosa. ⁷ Je! Ni mtu gani mfano wa Ayubu, Anywaye mzaha kama maji? ⁸ Atembeaye na hao watendao uovu, Na kwenda pamoja na watu wabaya. ⁹ Kwa kuwa amenena, Haimfai mtu lo lote Kujifurahisha na Mungu. ¹⁰ Kwa hiyo nisikilizeni, enyi wenye fahamu; Mungu asidhaniwe kutenda udhalimu; Wala Mwenyezi kufanya uovu. ¹¹ Kwani atamlipa binadamu kwa kazi yake, Naye atamfanya kila mtu kuona sawasawa na njia zake ¹² Naam, hakika, Mungu hatatenda mabaya, Wala Mwenyezi hatapotosha hukumu. ¹³ Ni nani aliyemwagiza kuiangalia dunia? Au ni nani aliyemwekea ulimwengu huu wote? ¹⁴ Kama akimwekea mtu moyo wake, Akijikusanyia roho yake na pumzi zake; ¹⁵ Wenye mwili wote wataangamia pamoja, Nao wanadamu watarejea tena kuwa mavumbi. ¹⁶ Ikiwa una ufahamu, sikia neno hili; Isikilize sauti ya maneno yangu. ¹⁷ Je! Atatawala mtu aichukiaye haki hata mmoja? Nawe, je! Utamhukumia mkosa aliye na haki na mwenye nguvu? ¹⁸ Je! Inafaa kumwambia mfalme, Wewe u mwovu? Au kuwaambia wakuu, Ninyi ni wabaya? ¹⁹ Sembuse huyo asiyependelea nyuso za wakuu, Wala hawajali matajiri kuliko maskini? Kwani wote ni kazi ya mikono yake, ²⁰ Hufa ghafula, hata usiku wa manane; Watu hutikisika na kwenda zao, Nao mashujaa huondolewa pasipo mkono wa mtu. ²¹ Kwani macho yake ya juu ya njia za mtu, Naye huiona miendo yake yote. ²² Hapana weusi, wala hilo giza tupu, Wawezapo kujificha watendao udhalimu. ²³ Kwani yeye hana haja ya kumfikiria mtu zaidi, ili aende mbele za Mungu ahukumiwe. ²⁴ Yeye huwavunja-vunja mashujaa pasina kuwachunguza, Na kuwaweka wengine mahali pao. ²⁵ Kwa sababu hiyo yeye huyatafiti matendo yao; Naye huwapindia usiku, wakaangamia. ²⁶ Yeye huwapiga kama watu wabaya Waziwazi mbele ya macho ya wengine; ²⁷ Kwa sababu walikengeuka, wasimwandame yeye, Wasikubali kuzishika njia zake hata moja; ²⁸ Hata wakafanya kilio cha maskini kumfikilia, Naye akasikia kilio cha hao wateswao. ²⁹ Akitoa utulivu yeye, ni nani awezaye kuhukumia makosa? Akificha uso wake, ni nani awezaye kumtazama? Kama hufanyiwa taifa, au mtu mmoja, ni sawasawa; ³⁰ Kwamba huyo mpotovu asitawale, Pasiwe na wa kuwatega watu. ³¹ Kwani kuna mtu aliyemwambia Mungu, Mimi nimevumilia kurudiwa, ingawa sikukosa; ³² Nisiyoyaona nifundishe wewe; Kama nimefanya uovu sitafanya tena? ³³ Je! Malipo yake yatakuwa kama upendavyo wewe, hata ukayakataa? Kwani yakupasa wewe kuchagua, si mimi; Kwa sababu hiyo sema uyajuayo. ³⁴ Watu walio na akili wataniambia, Naam, kila mtu mwenye hekima anisikiaye; ³⁵ Huyo Ayubu amesema pasipo maarifa, Na maneno yake hayana hekima. ³⁶ Laiti Ayubu angejaribiwa hata mwisho, Kwa kuwa amejibu kama watu waovu. ³⁷ Kwani huongeza uasi juu ya dhambi zake, Apiga makofi kati yetu, Na kuongeza maneno yake kinyume cha Mungu.