Actes 27.37
Vulgate

¹ ut autem iudicatum est eum navigare in Italiam et tradi Paulum cum reliquis custodiis centurioni nomine Iulio cohortis Augustae ² ascendentes autem navem hadrumetinam incipientem navigare circa Asiae loca sustulimus perseverante nobiscum Aristarcho Macedone Thessalonicense ³ sequenti autem die devenimus Sidonem humane autem tractans Iulius Paulum permisit ad amicos ire et curam sui agere ⁴ et inde cum sustulissemus subnavigavimus Cypro propterea quod essent venti contrarii ⁵ et pelagus Ciliciae et Pamphiliae navigantes venimus Lystram quae est Lyciae ⁶ et ibi inveniens centurio navem alexandrinam navigantem in Italiam transposuit nos in eam ⁷ et cum multis diebus tarde navigaremus et vix devenissemus contra Cnidum prohibente nos vento adnavigavimus Cretae secundum Salmonem ⁸ et vix iuxta navigantes venimus in locum quendam qui vocatur Boni portus cui iuxta erat civitas Thalassa ⁹ multo autem tempore peracto et cum iam non esset tuta navigatio eo quod et ieiunium iam praeterisset consolabatur Paulus ¹⁰ dicens eis viri video quoniam cum iniuria et multo damno non solum oneris et navis sed etiam animarum nostrarum incipit esse navigatio ¹¹ centurio autem gubernatori et nauclerio magis credebat quam his quae a Paulo dicebantur ¹² et cum aptus portus non esset ad hiemandum plurimi statuerunt consilium navigare inde si quo modo possent devenientes Phoenice hiemare portum Cretae respicientem ad africum et ad chorum ¹³ adspirante autem austro aestimantes propositum se tenere cum sustulissent de Asson legebant Cretam ¹⁴ non post multum autem misit se contra ipsam ventus typhonicus qui vocatur euroaquilo ¹⁵ cumque arrepta esset navis et non posset conari in ventum data nave flatibus ferebamur ¹⁶ insulam autem quandam decurrentes quae vocatur Caudam potuimus vix obtinere scapham ¹⁷ qua sublata adiutoriis utebantur accingentes navem timentes ne in Syrtim inciderent submisso vase sic ferebantur ¹⁸ valide autem nobis tempestate iactatis sequenti die iactum fecerunt ¹⁹ et tertia die suis manibus armamenta navis proiecerunt ²⁰ neque sole autem neque sideribus apparentibus per plures dies et tempestate non exigua inminente iam ablata erat spes omnis salutis nostrae ²¹ et cum multa ieiunatio fuisset tunc stans Paulus in medio eorum dixit oportebat quidem o viri audito me non tollere a Creta lucrique facere iniuriam hanc et iacturam ²² et nunc suadeo vobis bono animo esse amissio enim nullius animae erit ex vobis praeterquam navis ²³ adstitit enim mihi hac nocte angelus Dei cuius sum ego et cui deservio ²⁴ dicens ne timeas Paule Caesari te oportet adsistere et ecce donavit tibi Deus omnes qui navigant tecum ²⁵ propter quod bono animo estote viri credo enim Deo quia sic erit quemadmodum dictum est mihi ²⁶ in insulam autem quandam oportet nos devenire ²⁷ sed posteaquam quartadecima nox supervenit navigantibus nobis in Hadria circa mediam noctem suspicabantur nautae apparere sibi aliquam regionem ²⁸ qui submittentes invenerunt passus viginti et pusillum inde separati invenerunt passus quindecim ²⁹ timentes autem ne in aspera loca incideremus de puppi mittentes anchoras quattuor optabant diem fieri ³⁰ nautis vero quaerentibus fugere de navi cum misissent scapham in mare sub obtentu quasi a prora inciperent anchoras extendere ³¹ dixit Paulus centurioni et militibus nisi hii in navi manserint vos salvi fieri non potestis ³² tunc absciderunt milites funes scaphae et passi sunt eam excidere ³³ et cum lux inciperet fieri rogabat Paulus omnes sumere cibum dicens quartadecima hodie die expectantes ieiuni permanetis nihil accipientes ³⁴ propter quod rogo vos accipere cibum pro salute vestra quia nullius vestrum capillus de capite peribit ³⁵ et cum haec dixisset sumens panem gratias egit Deo in conspectu omnium et cum fregisset coepit manducare ³⁶ animaequiores autem facti omnes et ipsi adsumpserunt cibum ³⁷ eramus vero universae animae in navi ducentae septuaginta sex ³⁸ et satiati cibo adleviabant navem iactantes triticum in mare ³⁹ cum autem dies factus esset terram non agnoscebant sinum vero quendam considerabant habentem litus in quem cogitabant si possent eicere navem ⁴⁰ et cum anchoras abstulissent committebant se mari simul laxantes iuncturas gubernaculorum et levato artemone secundum flatum aurae tendebant ad litus ⁴¹ et cum incidissemus in locum bithalassum inpegerunt navem et prora quidem fixa manebat inmobilis puppis vero solvebatur a vi maris ⁴² militum autem consilium fuit ut custodias occiderent ne quis cum enatasset effugeret ⁴³ centurio autem volens servare Paulum prohibuit fieri iussitque eos qui possent natare mittere se primos et evadere et ad terram exire ⁴⁴ et ceteros alios in tabulis ferebant quosdam super ea quae de navi essent et sic factum est ut omnes animae evaderent ad terram