Psaumes 18.13
Bible en Swahili de l’est

¹ Wewe, Bwana, nguvu zangu, nakupenda sana; ² Bwana ni jabali langu, na boma langu, na mwokozi wangu, Mungu wangu, mwamba wangu ninayemkimbilia, Ngao yangu, na pembe ya wokovu wangu, na ngome yangu. ³ Nitamwita Bwana astahiliye kusifiwa, Hivyo nitaokoka na adui zangu. ⁴ Kamba za mauti zilinizunguka, Mafuriko ya uovu yakanitia hofu. ⁵ Kamba za kuzimu zilinizunguka, Mitego ya mauti ikanikabili. ⁶ Katika shida yangu nalimwita Bwana, Na kumlalamikia Mungu wangu. Akaisikia sauti yangu hekaluni mwake, Kilio changu kikaingia masikioni mwake. ⁷ Ndipo nchi iliyotikisika na kutetemeka, Misingi ya milima ikasuka-suka; Ikatikisika kwa sababu alikuwa na ghadhabu. ⁸ Kukapanda moshi kutoka puani mwake, Moto ukatoka kinywani mwake ukala, Makaa yakawashwa nao. ⁹ Aliziinamisha mbingu akashuka, Kukawa na giza kuu chini ya miguu yake. ¹⁰ Akapanda juu ya kerubi akaruka, Naam, aliruka upesi juu ya mabawa ya upepo. ¹¹ Alifanya giza kuwa mahali pake pa kujificha, Kuwa hema yake ya kumzunguka. Giza la maji na mawingu makuu ya mbinguni. ¹² Toka mwangaza uliokuwa mbele zake Kukapita mawingu yake makuu. Mvua ya mawe na makaa ya moto. ¹³ Bwana alipiga radi mbinguni, Yeye Aliye juu akaitoa sauti yake, Mvua ya mawe na makaa ya moto. ¹⁴ Akaipiga mishale yake akawatawanya, Naam, umeme mwingi sana, akawatapanya. ¹⁵ Ndipo ilipoonekana mikondo ya maji, Misingi ya ulimwengu ikafichuliwa, Ee Bwana, kwa kukemea kwako, Kwa mvumo wa pumzi ya puani mwako. ¹⁶ Alipeleka kutoka juu akanishika, Na kunitoa katika maji mengi. ¹⁷ Akaniokoa na adui yangu mwenye nguvu, Na wale walionichukia, Maana walikuwa na nguvu kuliko mimi. ¹⁸ Walinikabili siku ya msiba wangu, Lakini Bwana alikuwa tegemeo langu. ¹⁹ Akanitoa akanipeleka panapo nafasi, Aliniponya kwa kuwa alipendezwa nami. ²⁰ Bwana alinitendea sawasawa na haki yangu, Sawasawa na usafi wa mikono yangu akanilipa. ²¹ Maana nimezishika njia za Bwana, Wala sikumwasi Mungu wangu. ²² Hukumu zake zote zilikuwa mbele yangu, Wala amri zake sikujiepusha nazo. ²³ Nami nalikuwa mkamilifu mbele zake, Nikajilinda na uovu wangu. ²⁴ Mradi Bwana amenilipa sawasawa na haki yangu, Sawasawa na usafi wa mikono yangu mbele zake. ²⁵ Kwa mtu mwenye fadhili utakuwa mwenye fadhili; Kwa mkamilifu utajionyesha kuwa mkamilifu; ²⁶ Kwake ajitakasaye utajionyesha kuwa mtakatifu; Na kwa mpotovu utajionyesha kuwa mkaidi. ²⁷ Maana Wewe utawaokoa watu wanaoonewa, Na macho ya kiburi utayadhili. ²⁸ Kwa kuwa Wewe unaiwasha taa yangu; Bwana Mungu wangu aniangazia giza langu. ²⁹ Maana kwa msaada wako nafuatia jeshi, Kwa msaada wa Mungu wangu naruka ukuta. ³⁰ Mungu, njia yake ni kamilifu, Ahadi ya Bwana imehakikishwa, Yeye ndiye ngao yao. Wote wanaomkimbilia. ³¹ Maana ni nani aliye Mungu ila Bwana? Ni nani aliye mwamba ila Mungu wetu? ³² Mungu ndiye anifungaye mshipi wa nguvu, Naye anaifanya kamilifu njia yangu. ³³ Miguu yangu anaifanya kuwa ya kulungu, Na kunisimamisha mahali pangu pa juu. ³⁴ Ananifundisha mikono yangu vita, Mikono yangu ikaupinda upinde wa shaba. ³⁵ Nawe umenipa ngao ya wokovu wako, Mkono wako wa kuume umenitegemeza, Na unyenyekevu wako umenikuza. ³⁶ Umezifanyizia nafasi hatua zangu, Na miguu yangu haikuteleza. ³⁷ Nitawafuatia adui zangu na kuwapata, Wala sitarudi nyuma hata wakomeshwe. ³⁸ Nitawapiga-piga wasiweze kusimama, Wataanguka chini ya miguu yangu. ³⁹ Nawe hunifunga mshipi wa nguvu kwa vita, Hunitiishia chini yangu walioniondokea. ⁴⁰ Naam, adui zangu umewafanya wanipe visogo, Nao walionichukia nimewakatilia mbali. ⁴¹ Walipiga yowe, lakini hakuna wa kuokoa, Walimwita Bwana lakini hakuwajibu, ⁴² Nikawaponda kama mavumbi mbele ya upepo, Nikawatupa nje kama matope ya njiani. ⁴³ Umeniokoa na mashindano ya watu, Umenifanya niwe kichwa cha mataifa. Watu nisiowajua walinitumikia. ⁴⁴ Kwa kusikia tu habari zangu, Mara wakanitii. Wageni walinijia wakinyenyekea. ⁴⁵ Wageni nao walitepetea, Walitoka katika ngome zao wakitetemeka. ⁴⁶ Bwana ndiye aliye hai; Na ahimidiwe mwamba wangu; Na atukuzwe Mungu wa wokovu wangu; ⁴⁷ Ndiye Mungu anipatiaye kisasi; Na kuwatiisha watu chini yangu. ⁴⁸ Huniponya na adui zangu; Naam, waniinua juu yao walioniinukia, Na kuniponya na mtu wa jeuri. ⁴⁹ Basi, Bwana, nitakushukuru kati ya mataifa, Nami nitaliimbia jina lako. ⁵⁰ Ampa mfalme wake wokovu mkuu, Amfanyia fadhili masihi wake,Daudi na mzao wake hata milele.