Actes 2.30
Vulgate

¹ et cum conplerentur dies pentecostes erant omnes pariter in eodem loco ² et factus est repente de caelo sonus tamquam advenientis spiritus vehementis et replevit totam domum ubi erant sedentes ³ et apparuerunt illis dispertitae linguae tamquam ignis seditque supra singulos eorum ⁴ et repleti sunt omnes Spiritu Sancto et coeperunt loqui aliis linguis prout Spiritus Sanctus dabat eloqui illis ⁵ erant autem in Hierusalem habitantes Iudaei viri religiosi ex omni natione quae sub caelo sunt ⁶ facta autem hac voce convenit multitudo et mente confusa est quoniam audiebat unusquisque lingua sua illos loquentes ⁷ stupebant autem omnes et mirabantur dicentes nonne omnes ecce isti qui loquuntur Galilaei sunt ⁸ et quomodo nos audivimus unusquisque lingua nostra in qua nati sumus ⁹ Parthi et Medi et Elamitae et qui habitant Mesopotamiam et Iudaeam et Cappadociam Pontum et Asiam ¹⁰ Frygiam et Pamphiliam Aegyptum et partes Lybiae quae est circa Cyrenen et advenae romani ¹¹ Iudaei quoque et proselyti Cretes et Arabes audivimus loquentes eos nostris linguis magnalia Dei ¹² stupebant autem omnes et mirabantur ad invicem dicentes quidnam hoc vult esse ¹³ alii autem inridentes dicebant quia musto pleni sunt isti ¹⁴ stans autem Petrus cum undecim levavit vocem suam et locutus est eis viri iudaei et qui habitatis Hierusalem universi hoc vobis notum sit et auribus percipite verba mea ¹⁵ non enim sicut vos aestimatis hii ebrii sunt cum sit hora diei tertia ¹⁶ sed hoc est quod dictum est per prophetam Iohel ¹⁷ et erit in novissimis diebus dicit Dominus effundam de Spiritu meo super omnem carnem et prophetabunt filii vestri et filiae vestrae et iuvenes vestri visiones videbunt et seniores vestri somnia somniabunt ¹⁸ et quidem super servos meos et super ancillas meas in diebus illis effundam de Spiritu meo et prophetabunt ¹⁹ et dabo prodigia in caelo sursum et signa in terra deorsum sanguinem et ignem et vaporem fumi ²⁰ sol convertetur in tenebras et luna in sanguinem antequam veniat dies Domini magnus et manifestus ²¹ et erit omnis quicumque invocaverit nomen Domini salvus erit ²² viri israhelitae audite verba haec Iesum Nazarenum virum adprobatum a Deo in vobis virtutibus et prodigiis et signis quae fecit per illum Deus in medio vestri sicut vos scitis ²³ hunc definito consilio et praescientia Dei traditum per manus iniquorum adfigentes interemistis ²⁴ quem Deus suscitavit solutis doloribus inferni iuxta quod inpossibile erat teneri illum ab eo ²⁵ David enim dicit in eum providebam Dominum coram me semper quoniam a dextris meis est ne commovear ²⁶ propter hoc laetatum est cor meum et exultavit lingua mea insuper et caro mea requiescet in spe ²⁷ quoniam non derelinques animam meam in inferno neque dabis Sanctum tuum videre corruptionem ²⁸ notas fecisti mihi vias vitae replebis me iucunditate cum facie tua ²⁹ viri fratres liceat audenter dicere ad vos de patriarcha David quoniam et defunctus est et sepultus est et sepulchrum eius est apud nos usque in hodiernum diem ³⁰ propheta igitur cum esset et sciret quia iureiurando iurasset illi Deus de fructu lumbi eius sedere super sedem eius ³¹ providens locutus est de resurrectione Christi quia neque derelictus est in inferno neque caro eius vidit corruptionem ³² hunc Iesum resuscitavit Deus cui omnes nos testes sumus ³³ dextera igitur Dei exaltatus et promissione Spiritus Sancti accepta a Patre effudit hunc quem vos videtis et audistis ³⁴ non enim David ascendit in caelos dicit autem ipse dixit Dominus Domino meo sede a dextris meis ³⁵ donec ponam inimicos tuos scabillum pedum tuorum ³⁶ certissime ergo sciat omnis domus Israhel quia et Dominum eum et Christum Deus fecit hunc Iesum quem vos crucifixistis ³⁷ his auditis conpuncti sunt corde et dixerunt ad Petrum et ad reliquos apostolos quid faciemus viri fratres ³⁸ Petrus vero ad illos paenitentiam inquit agite et baptizetur unusquisque vestrum in nomine Iesu Christi in remissionem peccatorum vestrorum et accipietis donum Sancti Spiritus ³⁹ vobis enim est repromissio et filiis vestris et omnibus qui longe sunt quoscumque advocaverit Dominus Deus noster ⁴⁰ aliis etiam verbis pluribus testificatus est et exhortabatur eos dicens salvamini a generatione ista prava ⁴¹ qui ergo receperunt sermonem eius baptizati sunt et adpositae sunt in illa die animae circiter tria milia ⁴² erant autem perseverantes in doctrina apostolorum et communicatione fractionis panis et orationibus ⁴³ fiebat autem omni animae timor multa quoque prodigia et signa per apostolos fiebant in Hierusalem et metus erat magnus in universis ⁴⁴ omnes etiam qui credebant erant pariter et habebant omnia communia ⁴⁵ possessiones et substantias vendebant et dividebant illa omnibus prout cuique opus erat ⁴⁶ cotidie quoque perdurantes unianimiter in templo et frangentes circa domos panem sumebant cibum cum exultatione et simplicitate cordis ⁴⁷ conlaudantes Deum et habentes gratiam ad omnem plebem Dominus autem augebat qui salvi fierent cotidie in id ipsum