Marc 1.19
Bible en Swahili de l’est

¹ Mwanzo wa Injili ya Yesu Kristo, Mwana wa Mungu. ² Kama ilivyoandikwa katika nabii Isaya, Tazama, namtuma mjumbe wangu Mbele ya uso wako, Atakayeitengeneza njia yako. ³ Sauti ya mtu aliaye nyikani, Itengenezeni njia ya Bwana, Yanyosheni mapito yake. ⁴ Yohana alitokea, akibatiza nyikani, na kuuhubiri ubatizo wa toba liletalo ondoleo la dhambi. ⁵ Wakamwendea nchi yote ya Uyahudi, nao wa Yerusalemu wote, wakabatizwa katika mto wa Yordani, wakiziungama dhambi zao. ⁶ Na Yohana alikuwa amevaa singa za ngamia na mshipi wa ngozi kiunoni mwake, akala nzige na asali ya mwitu. ⁷ Akahubiri akisema, Yuaja nyuma yangu aliye na nguvu kuliko mimi, ambaye mimi sistahili kuinama na kuilegeza gidamu ya viatu vyake. ⁸ Mimi niliwabatiza kwa maji; bali yeye atawabatiza kwa Roho Mtakatifu. ⁹ Ikawa siku zile, Yesu alikuja kutoka Nazareti ya Galilaya, akabatizwa na Yohana katika Yordani. ¹⁰ Mara alipopanda kutoka majini, akaona mbingu zinapasuka, na Roho, kama hua, akishuka juu yake; ¹¹ na sauti ikatoka mbinguni, Wewe ndiwe Mwanangu, mpendwa wangu; nimependezwa nawe. ¹² Mara Roho akamtoa aende nyikani. ¹³ Akawako huko jangwani siku arobaini, hali akijaribiwa na Shetani; naye alikuwa pamoja na wanyama wa mwitu, na malaika walikuwa wakimhudumia. ¹⁴ Hata baada ya Yohana kutiwa gerezani, Yesu akaenda Galilaya, akiihubiri Habari Njema ya Mungu, ¹⁵ akisema, Wakati umetimia, na ufalme wa Mungu umekaribia; tubuni, na kuiamini Injili. ¹⁶ Naye alipokuwa akipita kando ya bahari ya Galilaya, akamwona Simoni na Andrea nduguye, wakitupa jarife baharini; kwa maana walikuwa wavuvi. ¹⁷ Yesu akawaambia, Njoni mnifuate, nami nitawafanya kuwa wavuvi wa watu. ¹⁸ Mara wakaziacha nyavu zao, wakamfuata. ¹⁹ Akaendelea mbele kidogo, akamwona Yakobo wa Zebedayo, na Yohana nduguye, nao pia walikuwa chomboni, wakizitengeneza nyavu zao. ²⁰ Mara akawaita, wakamwacha baba yao Zebedayo ndani ya chombo pamoja na watu wa mshahara, wakaenda, wakamfuata. ²¹ Wakashika njia mpaka Kapernaumu, na mara siku ya sabato akaingia katika sinagogi, akafundisha. ²² Wakashangaa mno kwa mafundisho yake; kwa maana alikuwa akiwafundisha kama mtu mwenye amri, wala si kama waandishi. ²³ Na mara palikuwapo ndani ya sinagogi lao mtu mwenye pepo mchafu; akapaza sauti, ²⁴ akisema, Tuna nini nawe, Yesu wa Nazareti? Je! Umekuja kutuangamiza? ²⁵ Nakutambua u nani, Mtakatifu wa Mungu. Yesu akamkemea, akisema, Fumba kinywa, umtoke. ²⁶ Yule pepo mchafu akamtia kifafa, akalia kwa sauti kuu, akamtoka. ²⁷ Wakashangaa wote, hata wakaulizana, wakisema, Nini hii? Ni elimu mpya! Maana kwa uweza awaamuru hata pepo wachafu, nao wamtii! ²⁸ Habari zake zikaenea mara kotekote katika nchi zote kandokando ya Galilaya. ²⁹ Na mara walipotoka katika sinagogi, walifika nyumbani kwa Simoni na Andrea, pamoja na Yakobo na Yohana. ³⁰ Naye mkwewe Simoni, mamaye mkewe, alikuwa kitandani, hawezi homa; na mara wakamwambia habari zake. ³¹ Akamkaribia, akamwinua kwa kumshika mkono, homa ikamwacha, akawatumikia. ³² Hata kulipokuwa jioni, na jua limekwisha kuchwa, walikuwa wakimletea wote waliokuwa hawawezi, na wenye pepo. ³³ Na mji wote ulikuwa umekusanyika mlangoni. ³⁴ Akaponya wengi waliokuwa na maradhi mbalimbali, akatoa pepo wengi, wala hakuwaacha pepo kunena, kwa sababu walimjua. ³⁵ Hata alfajiri na mapema sana akaondoka, akatoka akaenda zake mahali pasipokuwa na watu, akaomba huko. ³⁶ Simoni na wenziwe wakamfuata; ³⁷ nao walipomwona wakamwambia, Watu wote wanakutafuta. ³⁸ Akawaambia, Twendeni mahali pengine, mpaka vijiji vilivyo karibu, nipate kuhubiri huko nako; maana kwa hiyo nalitokea. ³⁹ Akaenda akihubiri katika masinagogi yao, katika nchi yote ya Galilaya, na kutoa pepo. ⁴⁰ Akaja kwake mtu mwenye ukoma, akamsihi na kumpigia magoti, na kumwambia, Ukitaka, waweza kunitakasa. ⁴¹ Naye akamhurumia, akanyosha mkono wake, akamgusa, akamwambia, Nataka, takasika. ⁴² Na mara ukoma wake ukamtoka, akatakasika. ⁴³ Akamkataza kwa nguvu, akamwondoa mara, ⁴⁴ akamwambia, Angalia, usimwambie mtu neno lolote, ila enenda zako ukajionyeshe kwa kuhani, ukatoe alivyoamuru Musa kwa kutakasika kwako, iwe ushuhuda kwao. ⁴⁵ Lakini akatoka, akaanza kuhubiri maneno mengi, na kulitangaza lile neno, hata Yesu asiweze tena kuingia mjini kwa wazi; bali alikuwako nje mahali pasipokuwa na watu, wakamwendea kutoka kila mahali.