1 Corinthiens 15.8
Bible en Swahili de l’est

¹ Basi, ndugu zangu, nawaarifu ile injili niliyowahubiri; ambayo ndiyo mliyoipokea, na katika hiyo mnasimama, ² na kwa hiyo mnaokolewa; ikiwa mnayashika sana maneno niliyowahubiri isipokuwa mliamini bure. ³ Kwa maana naliwatolea ninyi hapo mwanzo yale niliyoyapokea mimi mwenyewe, ya kuwa Kristo alikufa kwa ajili ya dhambi zetu, kama yanenavyo maandiko; ⁴ na ya kuwa alizikwa; na ya kuwa alifufuka siku ya tatu, kama yanenavyo maandiko; ⁵ na ya kuwa alimtokea Kefa; tena na wale Thenashara; ⁶ baadaye aliwatokea ndugu zaidi ya mia tano pamoja; katika hao wengi wanaishi hata sasa, ila baadhi yao wamelala; ⁷ baadaye akamtokea Yakobo; tena na mitume wote; ⁸ na mwisho wa watu wote, alinitokea mimi, kama ni mtu aliyezaliwa si kwa wakati wake. ⁹ Maana mimi ni mdogo katika mitume, nisiyestahili kuitwa mitume, kwa sababu naliliudhi Kanisa la Mungu. ¹⁰ Lakini kwa neema ya Mungu nimekuwa hivi nilivyo; na neema yake iliyo kwangu ilikuwa si bure, bali nalizidi sana kufanya kazi kupita wao wote; wala si mimi, bali ni neema ya Mungu pamoja nami. ¹¹ Basi, kama ni mimi, kama ni wale, ndivyo tuhubirivyo, na ndivyo mlivyoamini. ¹² Basi, ikiwa Kristo anahubiriwa ya kwamba amefufuka katika wafu, mbona baadhi yenu husema kwamba hakuna kiyama ya wafu? ¹³ Lakini kama hakuna kiyama ya wafu, Kristo naye hakufufuka; ¹⁴ tena kama Kristo hakufufuka, basi, kuhubiri kwetu ni bure na imani yenu ni bure. ¹⁵ Naam, na sisi tumeonekana kuwa mashahidi wa uongo wa Mungu; kwa maana tulimshuhudia Mungu ya kuwa alimfufua Kristo, ambaye hakumfufua, ikiwa wafu hawafufuliwi. ¹⁶ Maana kama wafu hawafufuliwi, Kristo naye hakufufuka. ¹⁷ Na kama Kristo hakufufuka, imani yenu ni bure; mngalimo katika dhambi zenu. ¹⁸ Na hapo wao nao waliolala katika Kristo wamepotea. ¹⁹ Kama katika maisha haya tu tumemtumaini Kristo, sisi tu maskini kuliko watu wote. ²⁰ Lakini sasa Kristo amefufuka katika wafu, limbuko lao waliolala. ²¹ Maana kwa kuwa mauti ililetwa na mtu, kadhalika na kiyama ya wafu ililetwa na mtu. ²² Kwa kuwa kama katika Adamu wote wanakufa, kadhalika na katika Kristo wote watahuishwa. ²³ Lakini kila mmoja mahali pake; limbuko ni Kristo; baadaye walio wake Kristo, atakapokuja. ²⁴ Hapo ndipo mwisho, atakapompa Mungu Baba ufalme wake; atakapobatilisha utawala wote, na mamlaka yote, na nguvu. ²⁵ Maana sharti amiliki yeye, hata awaweke maadui wake wote chini ya miguu yake. ²⁶ Adui wa mwisho atakayebatilishwa ni mauti. ²⁷ Kwa kuwa, Alivitiisha vitu vyote chini ya miguu yake. Lakini atakaposema, Vyote vimetiishwa, ni dhahiri ya kuwa yeye aliyemtiishia vitu vyote hayumo. ²⁸ Basi, vitu vyote vikiisha kutiishwa chini yake, ndipo Mwana mwenyewe naye atatiishwa chini yake yeye aliyemtiishia vitu vyote, ili kwamba Mungu awe yote katika wote. ²⁹ Au je! Wenye kubatizwa kwa ajili ya wafu watafanyaje? Kama wafu hawafufuliwi kamwe, kwa nini kubatizwa kwa ajili yao? ³⁰ Na sisi, kwa nini tumo hatarini kila saa? ³¹ Naam, ndugu, kwa huku kujisifu kwangu niliko nako juu yenu katika Kristo Yesu Bwana wetu, ninakufa kila siku. ³² Ikiwa, kwa jinsi ya kibinadamu, nalipigana na hayawani wakali kule Efeso, nina faida gani? Wasipofufuliwa wafu, na tule, na tunywe, maana kesho tutakufa. ³³ Msidanganyike; Mazungumzo mabaya huharibu tabia njema. ³⁴ Tumieni akili kama ipasavyo, wala msitende dhambi; kwa maana wengine hawamjui Mungu. Ninanena hayo niwafedheheshe. ³⁵ Lakini labda mtu atasema, Wafufuliwaje wafu? Nao huja kwa mwili gani? ³⁶ Ewe mpumbavu! Uipandayo haihuiki, isipokufa; ³⁷ nayo uipandayo, huupandi mwili ule utakaokuwa, ila chembe tupu, ikiwa ni ya ngano au nyingineyo; ³⁸ lakini Mungu huipa mwili kama apendavyo, na kila mbegu mwili wake. ³⁹ Nyama yote si nyama moja; ila nyingine ni ya wanadamu, nyingine ya hayawani, nyingine ya ndege, nyingine ya samaki. ⁴⁰ Tena kuna miili ya mbinguni, na miili ya duniani; lakini fahari yake ile ya mbinguni ni mbali, na fahari yake ile ya duniani ni mbali. ⁴¹ Kuna fahari moja ya jua, na fahari nyingine ya mwezi, na fahari nyingine ya nyota; maana iko tofauti ya fahari hata kati ya nyota na nyota. ⁴² Kadhalika na kiyama ya watu. Hupandwa katika uharibifu; hufufuliwa katika kutokuharibika; ⁴³ hupandwa katika aibu; hufufuliwa katika fahari; hupandwa katika udhaifu; hufufuliwa katika nguvu; ⁴⁴ hupandwa mwili wa asili; hufufuliwa mwili wa roho. Ikiwa uko mwili wa asili, na wa roho pia uko. ⁴⁵ Ndivyo ilivyoandikwa, Mtu wa kwanza, Adamu, akawa nafsi iliyo hai; Adamu wa mwisho ni roho yenye kuhuisha. ⁴⁶ Lakini hautangulii ule wa roho, bali ule wa asili; baadaye huja ule wa roho. ⁴⁷ Mtu wa kwanza atoka katika nchi, ni wa udongo. Mtu wa pili atoka mbinguni. ⁴⁸ Kama alivyo yeye wa udongo, ndivyo walivyo walio wa udongo; na kama alivyo yeye wa mbinguni, ndivyo walivyo walio wa mbinguni. ⁴⁹ Na kama tulivyoichukua sura yake yule wa udongo, kadhalika tutaichukua sura yake yeye aliye wa mbinguni. ⁵⁰ Ndugu zangu, nisemayo ni haya, ya kuwa nyama na damu haziwezi kuurithi ufalme wa Mungu; wala uharibifu kurithi kutokuharibika. ⁵¹ Angalieni, nawaambia ninyi siri; hatutalala sote, lakini sote tutabadilika, ⁵² kwa dakika moja, kufumba na kufumbua, wakati wa parapanda ya mwisho; maana parapanda italia, na wafu watafufuliwa, wasiwe na uharibifu, nasi tutabadilika. ⁵³ Maana sharti huu uharibikao uvae kutokuharibika, nao huu wa kufa uvae kutokufa. ⁵⁴ Basi huu uharibikao utakapovaa kutokuharibika, na huu wa kufa utakapovaa kutokufa, hapo ndipo litakapokuwa lile neno lililoandikwa, Mauti imemezwa kwa kushinda. ⁵⁵ Ku wapi, Ewe mauti, kushinda kwako? U wapi, Ewe mauti, uchungu wako? ⁵⁶ Uchungu wa mauti ni dhambi, na nguvu za dhambi ni torati. ⁵⁷ Lakini Mungu na ashukuriwe atupaye kushinda kwa Bwana wetu Yesu Kristo. ⁵⁸ Basi, ndugu zangu wapendwa, mwimarike, msitikisike, mkazidi sana kutenda kazi ya Bwana sikuzote, kwa kuwa mwajua ya kwamba taabu yenu siyo bure katika Bwana.