Exode 39.29
Vulgate

¹ de hyacintho vero et purpura vermiculo ac bysso fecit vestes quibus indueretur Aaron quando ministrabat in sanctis sicut praecepit Dominus Mosi ² fecit igitur superumerale de auro hyacintho et purpura coccoque bis tincto et bysso retorta ³ opere polymitario inciditque bratteas aureas et extenuavit in fila ut possint torqueri cum priorum colorum subtemine ⁴ duasque oras sibi invicem copulatas in utroque latere summitatum ⁵ et balteum ex hisdem coloribus sicut praeceperat Dominus Mosi ⁶ paravit et duos lapides onychinos adstrictos et inclusos auro et sculptos arte gemmaria nominibus filiorum Israhel ⁷ posuitque eos in lateribus superumeralis in monumentum filiorum Israhel sicut praeceperat Dominus Mosi ⁸ fecit et rationale opere polymito iuxta opus superumeralis ex auro hyacintho purpura coccoque bis tincto et bysso retorta ⁹ quadrangulum duplex mensurae palmi ¹⁰ et posuit in eo gemmarum ordines quattuor in primo versu erat sardius topazius zmaragdus ¹¹ in secundo carbunculus sapphyrus iaspis ¹² in tertio ligyrius achates amethistus ¹³ in quarto chrysolitus onychinus berillus circumdati et inclusi auro per ordines suos ¹⁴ ipsique lapides duodecim sculpti erant nominibus duodecim tribuum Israhel singuli per nomina singulorum ¹⁵ fecerunt in rationali et catenulas sibi invicem coherentes de auro purissimo ¹⁶ et duos uncinos totidemque anulos aureos porro anulos posuerunt in utroque latere rationalis ¹⁷ e quibus penderent duae catenae aureae quas inseruerunt uncinis qui in superumeralis angulis eminebant ¹⁸ haec et ante et retro ita conveniebant sibi ut superumerale et rationale mutuo necterentur ¹⁹ stricta ad balteum et anulis fortius copulata quos iungebat vitta hyacinthina ne laxe fluerent et a se invicem moverentur sicut praecepit Dominus Mosi ²⁰ fecerunt quoque tunicam superumeralis totam hyacinthinam ²¹ et capitium in superiori parte contra medium oramque per gyrum capitii textilem ²² deorsum autem ad pedes mala punica ex hyacintho purpura vermiculo ac bysso retorta ²³ et tintinabula de auro mundissimo quae posuerunt inter mala granata in extrema parte tunicae per gyrum ²⁴ tintinabulum aureum et malum punicum quibus ornatus incedebat pontifex quando ministerio fungebatur sicut praecepit Dominus Mosi ²⁵ fecerunt et tunicas byssinas opere textili Aaron et filiis eius ²⁶ et mitras cum coronulis suis ex bysso ²⁷ feminalia quoque linea byssina ²⁸ cingulum vero de bysso retorta hyacintho purpura ac vermiculo distinctum arte plumaria sicut praecepit Dominus Mosi ²⁹ fecerunt et lamminam sacrae venerationis de auro purissimo scripseruntque in ea opere gemmario Sanctum Domini ³⁰ et strinxerunt eam cum mitra vitta hyacinthina sicut praecepit Dominus Mosi ³¹ perfectum est igitur omne opus tabernaculi et tecti testimonii feceruntque filii Israhel cuncta quae praeceperat Dominus Mosi ³² et obtulerunt tabernaculum et tectum et universam supellectilem anulos tabulas vectes columnas ac bases ³³ opertorium de pellibus arietum rubricatis et aliud operimentum de ianthinis pellibus ³⁴ velum arcam vectes propitiatorium ³⁵ mensam cum vasis et propositionis panibus ³⁶ candelabrum lucernas et utensilia eorum cum oleo ³⁷ altare aureum et unguentum thymiama ex aromatibus ³⁸ et tentorium in introitu tabernaculi ³⁹ altare aeneum retiaculum vectes et vasa eius omnia labrum cum basi sua tentoria atrii et columnas cum basibus suis ⁴⁰ tentorium in introitu atrii funiculosque illius et paxillos nihil ex vasis defuit quae in ministerium tabernaculi et in tectum foederis iussa sunt fieri ⁴¹ vestes quoque quibus sacerdotes utuntur in sanctuario Aaron scilicet et filii eius ⁴² obtulerunt filii Israhel sicut praeceperat Dominus ⁴³ quae postquam Moses cuncta vidit expleta benedixit eis