Luc 24.17
Bible en Swahili de l’est

Résurrection de Jésus

¹ Hata siku ya kwanza ya juma, ilipoanza kupambazuka, walikwenda kaburini, wakiyaleta manukato waliyoweka tayari.
² Wakalikuta lile jiwe limevingirishwa mbali na kaburi,
³ Wakaingia, wasiuone mwili wa Bwana Yesu.
⁴ Ikawa walipokuwa wakifadhaika kwa ajili ya neno hilo, tazama, watu wawili walisimama karibu nao, wamevaa nguo za kumeta-meta;
⁵ nao walipoingiwa na hofu na kuinama kifudifudi hata nchi, hao waliwaambia, Kwa nini mnamtafuta aliye hai katika wafu?
⁶ Hayupo hapa, amefufuka. Kumbukeni alivyosema nanyi alipokuwa akaliko Galilaya,
⁷ akisema, Imempasa Mwana wa Adamu kutiwa mikononi mwa wenye dhambi, na kusulibiwa, na kufufuka siku ya tatu.
⁸ Wakayakumbuka maneno yake.
⁹ Wakaondoka kaburini, wakarudi; wakawaarifu wale kumi na mmoja na wengine wote habari za mambo hayo yote.
¹⁰ Nao ni Mariamu Magdalene, na Yoana, na Mariamu mamaye Yakobo, na wale wanawake wengine waliokuwa pamoja nao;
¹¹ hao waliwaambia mitume habari ya mambo hayo.
¹² Maneno yao yakaonekana kuwa kama upuzi kwao, wala hawakuwasadiki. Lakini Petro aliondoka akaenda mbio hata kaburini, akainama akachungulia ndani, akaviona vile vitambaa vya sanda tu; akaenda zake akiyastaajabia yaliyotukia.

Apparitions de Jésus ressuscité

¹³ Na tazama, siku ile ile watu wawili miongoni mwao walikuwa wakienda kijiji kimoja, jina lake Emau, kilichokuwa mbali na Yerusalemu kama mwendo wa saa mbili.
¹⁴ Nao walikuwa wakizungumza wao kwa wao habari za mambo hayo yote yaliyotukia.
¹⁵ Ikawa katika kuzungumza na kuulizana kwao, Yesu mwenyewe alikaribia, akaandamana nao.
¹⁶ Macho yao yakafumbwa wasimtambue.
¹⁷ Akawaambia, Ni maneno gani haya mnayosemezana hivi mnapotembea? Wakasimama wamekunja nyuso zao.
¹⁸ Akajibu mmoja wao, jina lake Kleopa, akamwambia, Je! Wewe peke yako u mgeni katika Yerusalemu, hata huyajui yaliyotukia humo siku hizi?
¹⁹ Akawauliza, Mambo gani? Wakamwambia, Mambo ya Yesu wa Nazareti, aliyekuwa mtu nabii, mwenye uwezo katika kutenda na kunena mbele za Mungu na watu wote;
²⁰ tena jinsi wakuu wa makuhani na wakubwa wetu walivyomtia katika hukumu ya kufa, wakamsulibisha.
²¹ Nasi tulikuwa tukitumaini ya kuwa yeye ndiye atakayewakomboa Israeli. Zaidi ya hayo yote, leo ni siku ya tatu tangu yalipotendeka mambo hayo;
²² tena, wanawake kadha wa kadha wa kwetu walitushitusha, waliokwenda kaburini asubuhi na mapema,
²³ wasiuone mwili wake; wakaja wakasema ya kwamba wametokewa na malaika waliosema kwamba yu hai.
²⁴ Na wengine waliokuwa pamoja nasi walikwenda kaburini wakaona vivyo hivyo kama wale wanawake walivyosema, ila yeye hawakumwona.
²⁵ Akawaambia, Enyi msiofahamu, wenye mioyo mizito ya kuamini yote waliyoyasema manabii!
²⁶ Je! Haikumpasa Kristo kupata mateso haya na kuingia katika utukufu wake?
²⁷ Akaanza kutoka Musa na manabii wote, akawaeleza katika maandiko yote mambo yaliyomhusu yeye mwenyewe.
²⁸ Wakakikaribia kile kijiji walichokuwa wakienda, naye alifanya kama anataka kuendelea mbele.
²⁹ Wakamshawishi wakisema, Kaa pamoja nasi, kwa kuwa kumekuchwa, na mchana unakwisha. Akaingia ndani kukaa nao.
³⁰ Ikawa alipokuwa ameketi nao chakulani, alitwaa mkate, akaubariki, akaumega, akawapa.
³¹ Yakafumbuliwa macho yao, wakamtambua; kisha akatoweka mbele yao.
³² Wakaambiana, Je! Mioyo yetu haikuwaka ndani yetu hapo alipokuwa akisema nasi njiani, na kutufunulia maandiko?
³³ Wakaondoka saa ile ile, wakarejea Yerusalemu, wakawakuta wale kumi na mmoja wamekutanika, wao na wale waliokuwa pamoja nao,
³⁴ wakisema, Bwana amefufuka kweli kweli, naye amemtokea Simoni.
³⁵ Nao waliwapa habari ya mambo yale ya njiani, na jinsi alivyotambulikana nao katika kuumega mkate.
³⁶ Na walipokuwa katika kusema habari hiyo, yeye mwenyewe alisimama katikati yao, akawaambia, Amani iwe kwenu.
³⁷ Wakashituka, wakaogopa sana, wakidhani ya kwamba wanaona roho.
³⁸ Akawaambia, Mbona mnafadhaika? Na kwa nini mnaona shaka mioyoni mwenu?
³⁹ Tazameni mikono yangu na miguu yangu, ya kuwa ni mimi mwenyewe. Nishikenishikeni, mwone; kwa kuwa roho haina mwili na mifupa kama mnavyoniona mimi kuwa nayo.
⁴⁰ Na baada ya kusema hayo aliwaonyesha mikono yake na miguu yake.
⁴¹ Basi walipokuwa hawajaamini kwa furaha, huku wakistaajabu, aliwaambia, Mna chakula cho chote hapa?
⁴² Wakampa kipande cha samaki wa kuokwa.
⁴³ Akakitwaa, akala mbele yao.
⁴⁴ Kisha akawaambia, Hayo ndiyo maneno yangu niliyowaambia nilipokuwa nikali pamoja nanyi, ya kwamba ni lazima yatimizwe yote niliyoandikiwa katika Torati ya Musa, na katika Manabii na Zaburi.
⁴⁵ Ndipo akawafunulia akili zao wapate kuelewa na maandiko.
⁴⁶ Akawaambia, Ndivyo ilivyoandikwa, kwamba Kristo atateswa na kufufuka siku ya tatu;
⁴⁷ na kwamba mataifa yote watahubiriwa kwa jina lake habari ya toba na ondoleo la dhambi, kuanza tangu Yerusalemu.
⁴⁸ Nanyi ndinyi mashahidi wa mambo haya.
⁴⁹ Na tazama, nawaletea juu yenu ahadi ya Baba yangu; lakini kaeni humu mjini, hata mvikwe uwezo utokao juu.

Ascension de Jésus

⁵⁰ Akawaongoza mpaka Bethania, akainua mikono yake akawabariki.
⁵¹ Ikawa katika kuwabariki, alijitenga nao; akachukuliwa juu mbinguni.
⁵² Wakamwabudu; kisha wakarudi Yerusalemu wenye furaha kuu.
⁵³ Nao walikuwa daima ndani ya hekalu, wakimsifu Mungu.