Luc 11.21
Vulgate

¹ et factum est cum esset in loco quodam orans ut cessavit dixit unus ex discipulis eius ad eum Domine doce nos orare sicut et Iohannes docuit discipulos suos ² et ait illis cum oratis dicite Pater sanctificetur nomen tuum adveniat regnum tuum ³ panem nostrum cotidianum da nobis cotidie ⁴ et dimitte nobis peccata nostra siquidem et ipsi dimittimus omni debenti nobis et ne nos inducas in temptationem ⁵ et ait ad illos quis vestrum habebit amicum et ibit ad illum media nocte et dicit illi amice commoda mihi tres panes ⁶ quoniam amicus meus venit de via ad me et non habeo quod ponam ante illum ⁷ et ille de intus respondens dicat noli mihi molestus esse iam ostium clausum est et pueri mei mecum sunt in cubili non possum surgere et dare tibi ⁸ dico vobis et si non dabit illi surgens eo quod amicus eius sit propter inprobitatem tamen eius surget et dabit illi quotquot habet necessarios ⁹ et ego vobis dico petite et dabitur vobis quaerite et invenietis pulsate et aperietur vobis ¹⁰ omnis enim qui petit accipit et qui quaerit invenit et pulsanti aperietur ¹¹ quis autem ex vobis patrem petet panem numquid lapidem dabit illi aut piscem numquid pro pisce serpentem dabit illi ¹² aut si petierit ovum numquid porriget illi scorpionem ¹³ si ergo vos cum sitis mali nostis bona data dare filiis vestris quanto magis Pater vester de caelo dabit spiritum bonum petentibus se ¹⁴ et erat eiciens daemonium et illud erat mutum et cum eiecisset daemonium locutus est mutus et admiratae sunt turbae ¹⁵ quidam autem ex eis dixerunt in Beelzebub principe daemoniorum eicit daemonia ¹⁶ et alii temptantes signum de caelo quaerebant ab eo ¹⁷ ipse autem ut vidit cogitationes eorum dixit eis omne regnum in se ipsum divisum desolatur et domus supra domum cadet ¹⁸ si autem et Satanas in se ipsum divisus est quomodo stabit regnum ipsius quia dicitis in Beelzebub eicere me daemonia ¹⁹ si autem ego in Beelzebub eicio daemonia filii vestri in quo eiciunt ideo ipsi iudices vestri erunt ²⁰ porro si in digito Dei eicio daemonia profecto praevenit in vos regnum Dei ²¹ cum fortis armatus custodit atrium suum in pace sunt ea quae possidet ²² si autem fortior illo superveniens vicerit eum universa arma eius aufert in quibus confidebat et spolia eius distribuit ²³ qui non est mecum adversum me est et qui non colligit mecum dispergit ²⁴ cum inmundus spiritus exierit de homine perambulat per loca inaquosa quaerens requiem et non inveniens dicit revertar in domum meam unde exivi ²⁵ et cum venerit invenit scopis mundatam ²⁶ et tunc vadit et adsumit septem alios spiritus nequiores se et ingressi habitant ibi et sunt novissima hominis illius peiora prioribus ²⁷ factum est autem cum haec diceret extollens vocem quaedam mulier de turba dixit illi beatus venter qui te portavit et ubera quae suxisti ²⁸ at ille dixit quippini beati qui audiunt verbum Dei et custodiunt ²⁹ turbis autem concurrentibus coepit dicere generatio haec generatio nequam est signum quaerit et signum non dabitur illi nisi signum Ionae ³⁰ nam sicut Ionas fuit signum Ninevitis ita erit et Filius hominis generationi isti ³¹ regina austri surget in iudicio cum viris generationis huius et condemnabit illos quia venit a finibus terrae audire sapientiam Salomonis et ecce plus Salomone hic ³² viri ninevitae surgent in iudicio cum generatione hac et condemnabunt illam quia paenitentiam egerunt ad praedicationem Ionae et ecce plus Iona hic ³³ nemo lucernam accendit et in abscondito ponit neque sub modio sed supra candelabrum ut qui ingrediuntur lumen videant ³⁴ lucerna corporis tui est oculus tuus si oculus tuus fuerit simplex totum corpus tuum lucidum erit si autem nequam fuerit etiam corpus tuum tenebrosum erit ³⁵ vide ergo ne lumen quod in te est tenebrae sint ³⁶ si ergo corpus tuum totum lucidum fuerit non habens aliquam partem tenebrarum erit lucidum totum et sicut lucerna fulgoris inluminabit te ³⁷ et cum loqueretur rogavit illum quidam Pharisaeus ut pranderet apud se et ingressus recubuit ³⁸ Pharisaeus autem coepit intra se reputans dicere quare non baptizatus esset ante prandium ³⁹ et ait Dominus ad illum nunc vos Pharisaei quod de foris est calicis et catini mundatis quod autem intus est vestrum plenum est rapina et iniquitate ⁴⁰ stulti nonne qui fecit quod de foris est etiam id quod de intus est fecit ⁴¹ verumtamen quod superest date elemosynam et ecce omnia munda sunt vobis ⁴² sed vae vobis Pharisaeis quia decimatis mentam et rutam et omne holus et praeteritis iudicium et caritatem Dei haec autem oportuit facere et illa non omittere ⁴³ vae vobis Pharisaeis quia diligitis primas cathedras in synagogis et salutationes in foro ⁴⁴ vae vobis quia estis ut monumenta quae non parent et homines ambulantes supra nesciunt ⁴⁵ respondens autem quidam ex legis peritis ait illi magister haec dicens etiam nobis contumeliam facis ⁴⁶ at ille ait et vobis legis peritis vae quia oneratis homines oneribus quae portari non possunt et ipsi uno digito vestro non tangitis sarcinas ⁴⁷ vae vobis quia aedificatis monumenta prophetarum patres autem vestri occiderunt illos ⁴⁸ profecto testificamini quod consentitis operibus patrum vestrorum quoniam quidem ipsi eos occiderunt vos autem aedificatis eorum sepulchra ⁴⁹ propterea et sapientia Dei dixit mittam ad illos prophetas et apostolos et ex illis occident et persequentur ⁵⁰ ut inquiratur sanguis omnium prophetarum qui effusus est a constitutione mundi a generatione ista ⁵¹ a sanguine Abel usque ad sanguinem Zacchariae qui periit inter altare et aedem ita dico vobis requiretur ab hac generatione ⁵² vae vobis legis peritis quia tulistis clavem scientiae ipsi non introistis et eos qui introibant prohibuistis ⁵³ cum haec ad illos diceret coeperunt Pharisaei et legis periti graviter insistere et os eius opprimere de multis ⁵⁴ insidiantes et quaerentes capere aliquid ex ore eius ut accusarent eum