Lévitique 13
Vulgate

¹ locutus est Dominus ad Mosen et Aaron dicens ² homo in cuius carne et cute ortus fuerit diversus color sive pustula aut quasi lucens quippiam id est plaga leprae adducetur ad Aaron sacerdotem vel ad unum quemlibet filiorum eius ³ qui cum viderit lepram in cute et pilos in album mutatos colorem ipsamque speciem leprae humiliorem cute et carne reliqua plaga leprae est et ad arbitrium eius separabitur ⁴ sin autem lucens candor fuerit in cute nec humilior carne reliqua et pili coloris pristini recludet eum sacerdos septem diebus ⁵ et considerabit die septimo et siquidem lepra ultra non creverit nec transierit in cute priores terminos rursum includet eum septem diebus aliis ⁶ et die septimo contemplabitur si obscurior fuerit lepra et non creverit in cute mundabit eum quia scabies est lavabitque homo vestimenta sua et mundus erit ⁷ quod si postquam a sacerdote visus est et redditus munditiae iterum lepra creverit adducetur ad eum ⁸ et inmunditiae condemnabitur ⁹ plaga leprae si fuerit in homine adducetur ad sacerdotem ¹⁰ et videbit eum cumque color albus in cute fuerit et capillorum mutarit aspectum ipsa quoque caro viva apparuerit ¹¹ lepra vetustissima iudicabitur atque inolita cuti contaminabit itaque eum sacerdos et non recludet quia perspicue inmunditia est ¹² sin autem effloruerit discurrens lepra in cute et operuerit omnem carnem a capite usque ad pedes quicquid sub aspectu oculorum cadit ¹³ considerabit eum sacerdos et teneri lepra mundissima iudicabit eo quod omnis in candorem versa sit et idcirco homo mundus erit ¹⁴ quando vero caro vivens in eo apparuerit ¹⁵ tunc sacerdotis iudicio polluetur et inter inmundos reputabitur caro enim viva si lepra aspergatur inmunda est ¹⁶ quod si rursum versa fuerit in alborem et totum hominem operuerit ¹⁷ considerabit eum sacerdos et mundum esse decernet ¹⁸ caro et cutis in qua ulcus natum est et sanatum ¹⁹ et in loco ulceris cicatrix apparuerit alba sive subrufa adducetur homo ad sacerdotem ²⁰ qui cum viderit locum leprae humiliorem carne reliqua et pilos versos in candorem contaminabit eum plaga enim leprae orta est in ulcere ²¹ quod si pilus coloris est pristini et cicatrix subobscura et vicina carne non est humilior recludet eum septem diebus ²² et siquidem creverit adiudicabit eum leprae ²³ sin autem steterit in loco suo ulceris est cicatrix et homo mundus erit ²⁴ caro et cutis quam ignis exuserit et sanata albam sive rufam habuerit cicatricem ²⁵ considerabit eam sacerdos et ecce versa est in alborem et locus eius reliqua cute humilior contaminabit eum quia plaga leprae in cicatrice orta est ²⁶ quod si pilorum color non fuerit inmutatus nec humilior plaga carne reliqua et ipsa leprae species fuerit subobscura recludet eum septem diebus ²⁷ et die septimo contemplabitur si creverit in cute lepra contaminabit eum ²⁸ sin autem in loco suo candor steterit non satis clarus plaga conbustionis est et idcirco mundabitur quia cicatrix est conbusturae ²⁹ vir sive mulier in cuius capite vel barba germinarit lepra videbit eos sacerdos ³⁰ et siquidem humilior fuerit locus carne reliqua et capillus flavus solitoque subtilior contaminabit eos quia lepra capitis ac barbae est ³¹ sin autem viderit et locum maculae aequalem vicinae carni et capillum nigrum recludet eos septem diebus ³² et die septimo intuebitur si non creverit macula et capillus sui coloris est et locus plagae carni reliquae aequalis ³³ radetur homo absque loco maculae et includetur septem diebus aliis ³⁴ si die septimo visa fuerit stetisse plaga in loco suo nec humilior carne reliqua mundabit eum lotisque vestibus mundus erit ³⁵ sin autem post emundationem rursus creverit macula in cute ³⁶ non quaeret amplius utrum capillus in flavum colorem sit commutatus quia aperte inmundus est ³⁷ porro si steterit macula et capilli nigri fuerint noverit hominem esse sanatum et confidenter eum pronuntiet mundum ³⁸ vir et mulier in cuius cute candor apparuerit ³⁹ intuebitur eos sacerdos si deprehenderit subobscurum alborem lucere in cute sciat non esse lepram sed maculam coloris candidi et hominem mundum ⁴⁰ vir de cuius capite capilli fluunt calvus ac mundus est ⁴¹ et si a fronte ceciderint pili recalvaster et mundus est ⁴² sin autem in calvitio sive in recalvatione albus vel rufus color fuerit exortus ⁴³ et hoc sacerdos viderit condemnabit eum haut dubiae leprae quae orta est in calvitio ⁴⁴ quicumque ergo maculatus fuerit lepra et separatus ad arbitrium sacerdotis ⁴⁵ habebit vestimenta dissuta caput nudum os veste contectum contaminatum ac sordidum se clamabit ⁴⁶ omni tempore quo leprosus est et inmundus solus habitabit extra castra ⁴⁷ vestis lanea sive linea quae lepram habuerit ⁴⁸ in stamine atque subtemine aut certe pellis vel quicquid ex pelle confectum est ⁴⁹ si alba aut rufa macula fuerit infecta lepra reputabitur ostendeturque sacerdoti ⁵⁰ qui consideratam recludet septem diebus ⁵¹ et die septimo rursus aspiciens si crevisse deprehenderit lepra perseverans est pollutum iudicabit vestimentum et omne in quo fuerit inventa ⁵² et idcirco conburetur flammis ⁵³ quod si eam viderit non crevisse ⁵⁴ praecipiet et lavabunt id in quo lepra est recludetque illud septem diebus aliis ⁵⁵ et cum viderit faciem quidem pristinam non reversam nec tamen crevisse lepram inmundum iudicabit et igne conburet eo quod infusa sit in superficie vestimenti vel per totum lepra ⁵⁶ sin autem obscurior fuerit locus leprae postquam vestis est lota abrumpet eum et a solido dividet ⁵⁷ quod si ultra apparuerit in his locis quae prius inmaculata erant lepra volatilis et vaga debet igne conburi ⁵⁸ si cessaverit lavabit ea quae pura sunt secundo et munda erunt ⁵⁹ ista est lex leprae vestimenti lanei et linei staminis atque subteminis omnisque supellectilis pelliciae quomodo mundari debeat vel contaminari