Matthieu 27.43
Bible en Swahili de l’est

Jésus devant le gouverneur romain

¹ Na ilipokuwa asubuhi, wakuu wa makuhani wote na wazee wa watu wakafanya shauri juu ya Yesu, wapate kumwua;
² wakamfunga, wakamchukua, wakampeleka kwa Pilato aliyekuwa liwali.
³ Kisha Yuda, yule mwenye kumsaliti, alipoona ya kuwa amekwisha kuhukumiwa, alijuta, akawarudishia wakuu wa makuhani na wazee vile vipande thelathini vya fedha, akasema, Nalikosa nilipoisaliti damu isiyo na hatia.
⁴ Wakasema, Basi, haya yatupasani sisi? Yaangalie haya wewe mwenyewe.
⁵ Akavitupa vile vipande vya fedha katika hekalu, akaondoka; akaenda, akajinyonga.
⁶ Wakuu wa makuhani wakavitwaa vile vipande vya fedha, wakasema, Si halali kuviweka katika sanduku ya sadaka, kwa kuwa ni kima cha damu.
⁷ Wakafanya shauri, wakavitumia kwa kununua konde la mfinyanzi liwe mahali pa kuzika wageni.
⁸ Kwa hiyo konde lile huitwa konde la damu hata leo.
⁹ Ndipo likatimia neno lililonenwa na nabii Yeremia, akisema, Wakavitwaa vipande thelathini vya fedha, kima chake aliyetiwa kima, ambaye baadhi ya Waisraeli walimtia kima;
¹⁰ wakavitumia kwa kununua konde la mfinyanzi, kama Bwana alivyoniagiza.
¹¹ Naye Yesu akasimama mbele ya liwali; liwali akamwuliza, akasema, Wewe ndiwe mfalme wa Wayahudi? Yesu akamwambia, Wewe wasema.
¹² Lakini aliposhitakiwa na wakuu wa makuhani na wazee, hakujibu hata neno.
¹³ Ndipo Pilato akamwambia, Husikii ni mambo mangapi wanayokushuhudia?
¹⁴ Asimjibu hata neno moja, hata liwali akastaajabu sana.
¹⁵ Basi wakati wa siku kuu, liwali desturi yake huwafungulia mkutano mfungwa mmoja waliyemtaka.
¹⁶ Basi palikuwa na mfungwa mashuhuri siku zile, aitwaye Baraba.
¹⁷ Basi walipokutanika, Pilato akawaambia, Mnataka niwafungulie yupi? Yule Baraba, au Yesu aitwaye Kristo?
¹⁸ Kwa maana alijua ya kuwa wamemtoa kwa husuda.
¹⁹ Na alipokuwa ameketi juu ya kiti cha hukumu, mkewe alimpelekea mjumbe, kumwambia, Usiwe na neno na yule mwenye haki; kwa sababu nimeteswa mengi leo katika ndoto kwa ajili yake.
²⁰ Nao wakuu wa makuhani na wazee wakawashawishi makutano ili wamtake Baraba, na kumwangamiza Yesu.
²¹ Basi liwali akajibu, akawaambia, Mnataka niwafungulie yupi katika hawa wawili? Wakasema, Baraba.
²² Pilato akawaambia, Basi, nimtendeje Yesu aitwaye Kristo? Wakasema wote, Asulibiwe.
²³ Akasema, Kwani? Ni ubaya gani alioutenda? Wakazidi sana kupiga kelele, wakisema, Na asulibiwe.
²⁴ Basi Pilato alipoona ya kuwa hafai lo lote, bali ghasia inazidi tu, akatwaa maji, akanawa mikono yake mbele ya mkutano, akasema, Mimi sina hatia katika damu ya mtu huyu mwenye haki; yaangalieni haya ninyi wenyewe.
²⁵ Watu wote wakajibu wakasema, Damu yake na iwe juu yetu, na juu ya watoto wetu.
²⁶ Ndipo akawafungulia Baraba; na baada ya kumpiga Yesu mijeledi, akamtoa ili asulibiwe.
²⁷ Ndipo askari wa liwali wakamchukua Yesu ndani ya Praitorio, wakamkusanyikia kikosi kizima.
²⁸ Wakamvua nguo, wakamvika vazi jekundu.
²⁹ Wakasokota taji ya miiba, wakaiweka juu ya kichwa chake, na mwanzi katika mkono wake wa kuume; wakapiga magoti mbele yake, wakamdhihaki, wakisema, Salamu, Mfalme wa Wayahudi!
³⁰ Kisha wakamtemea mate, wakautwaa ule mwanzi, wakampiga-piga kichwani.
³¹ Walipokwisha kumdhihaki, wakalivua lile vazi, wakamvika mavazi yake, wakamchukua kumsulibisha.

Crucifixion et mort de Jésus

³² Hata walipokuwa wakitoka, wakamwona mtu Mkirene, jina lake Simoni; huyu wakamshurutisha auchukue msalaba wake.
³³ Na walipofika mahali paitwapo Golgotha, yaani, Fuvu la kichwa,
³⁴ wakampa kunywa divai iliyochanganyika na nyongo; lakini yeye alipoionja hakutaka kunywa.
³⁵ Walipokwisha kumsulibisha, waligawa mavazi yake, wakipiga kura; [ili litimie neno lililonenwa na nabii, Waligawa nguo zangu kati yao, na juu ya vazi langu walipiga kura.]
³⁶ Wakaketi, wakamlinda huko.
³⁷ Wakaweka juu ya kichwa chake mashitaka yake, yaliyoandikwa HUYU NI YESU, MFALME WA WAYAHUDI.
³⁸ Wakati uo huo wanyang’anyi wawili wakasulibiwa pamoja naye, mmoja mkono wake wa kuume, na mmoja mkono wake wa kushoto.
³⁹ Nao waliokuwa wakipita njiani wakamtukana, wakitikisa-tikisa vichwa vyao, wakisema,
⁴⁰ Ewe mwenye kulivunja hekalu na kulijenga kwa siku tatu, jiokoe nafsi yako; ukiwa ndiwe Mwana wa Mungu, shuka msalabani.
⁴¹ Kadhalika na wale wakuu wa makuhani wakamdhihaki pamoja na waandishi na wazee, wakisema, Aliokoa wengine, hawezi kujiokoa mwenyewe.
⁴² Yeye ni mfalme wa Israeli; na ashuke sasa msalabani, nasi tutamwamini.
⁴³ Amemtegemea Mungu; na amwokoe sasa, kama anamtaka; kwa maana alisema, Mimi ni Mwana wa Mungu.
⁴⁴ Pia wale wanyang’anyi waliosulibiwa pamoja naye walimshutumu vile vile.
⁴⁵ Basi tangu saa sita palikuwa na giza juu ya nchi yote hata saa tisa.
⁴⁶ Na kama saa tisa, Yesu akapaza sauti yake kwa nguvu akisema, Eloi, Eloi, lama sabakthani? Yaani, Mungu wangu, Mungu wangu, mbona umeniacha?
⁴⁷ Na baadhi yao waliohudhuria, waliposikia, walisema, Huyu anamwita Eliya.
⁴⁸ Mara mmoja wao akaenda mbio, akatwaa sifongo, akaijaza siki, akaitia juu ya mwanzi, akamnywesha.
⁴⁹ Wale wengine wakasema, Acha; na tuone kama Eliya anakuja kumwokoa.
⁵⁰ Naye Yesu akiisha kupaza sauti tena kwa nguvu, akaitoa roho yake.
⁵¹ Na tazama, pazia la hekalu likapasuka vipande viwili toka juu hata chini; nchi ikatetemeka; miamba ikapasuka;
⁵² makaburi yakafunuka; ikainuka miili mingi ya watakatifu waliolala;
⁵³ nao wakiisha kutoka makaburini mwao, baada ya kufufuka kwake, wakauingia mji mtakatifu, wakawatokea wengi.
⁵⁴ Basi yule akida, na hao waliokuwa pamoja naye wakimlinda Yesu, walipoliona tetemeko la nchi na mambo yaliyofanyika, wakaogopa sana, wakisema, Hakika huyu alikuwa Mwana wa Mungu.
⁵⁵ Palikuwa na wanawake wengi pale wakitazama kwa mbali, hao ndio waliomfuata Yesu toka Galilaya, na kumtumikia.
⁵⁶ Miongoni mwao alikuwamo Mariamu Magdalene, na Mariamu mama yao Yakobo na Yusufu, na mama yao wana wa Zebedayo.

Mise au tombeau du corps de Jésus

⁵⁷ Hata ilipokuwa jioni akafika mtu tajiri wa Arimathaya, jina lake Yusufu, naye mwenyewe alikuwa mwanafunzi wa Yesu;
⁵⁸ mtu huyu alimwendea Pilato akauomba mwili wa Yesu. Ndipo Pilato akaamuru apewe.
⁵⁹ Yusufu akautwaa mwili, akauzonga-zonga katika sanda ya kitani safi,
⁶⁰ akauweka katika kaburi lake jipya, alilokuwa amelichonga mwambani; akavingirisha jiwe kubwa mbele ya mlango wa kaburi, akaenda zake.
⁶¹ Na pale walikuwapo Mariamu Magdalene, na Mariamu yule wa pili, wameketi kulielekea kaburi.
⁶² Hata siku ya pili, ndiyo iliyo baada ya Maandalio, wakuu wa makuhani, na Mafarisayo wakamkusanyikia Pilato,
⁶³ wakasema, Bwana, tumekumbuka kwamba yule mjanja alisema, alipokuwa akali hai, Baada ya siku tatu nitafufuka.
⁶⁴ Basi amuru kwamba kaburi lilindwe salama hata siku ya tatu; wasije wanafunzi wake wakamwiba, na kuwaambia watu, Amefufuka katika wafu; na udanganyifu wa mwisho utapita ule wa kwanza.
⁶⁵ Pilato akawaambia, Mna askari; nendeni mkalilinde salama kadiri mjuavyo.
⁶⁶ Wakaenda, wakalilinda kaburi salama, kwa kulitia lile jiwe muhuri, pamoja na wale askari walinzi.