Marc 6.47
Vulgate

¹ et egressus inde abiit in patriam suam et sequebantur illum discipuli sui ² et facto sabbato coepit in synagoga docere et multi audientes admirabantur in doctrina eius dicentes unde huic haec omnia et quae est sapientia quae data est illi et virtutes tales quae per manus eius efficiuntur ³ nonne iste est faber filius Mariae frater Iacobi et Ioseph et Iudae et Simonis nonne et sorores eius hic nobiscum sunt et scandalizabantur in illo ⁴ et dicebat eis Iesus quia non est propheta sine honore nisi in patria sua et in cognatione sua et in domo sua ⁵ et non poterat ibi virtutem ullam facere nisi paucos infirmos inpositis manibus curavit ⁶ et mirabatur propter incredulitatem eorum ⁷ et circumibat castella in circuitu docens et convocavit duodecim et coepit eos mittere binos et dabat illis potestatem spirituum inmundorum ⁸ et praecepit eis ne quid tollerent in via nisi virgam tantum non peram non panem neque in zona aes ⁹ sed calciatos sandaliis et ne induerentur duabus tunicis ¹⁰ et dicebat eis quocumque introieritis in domum illic manete donec exeatis inde ¹¹ et quicumque non receperint vos nec audierint vos exeuntes inde excutite pulverem de pedibus vestris in testimonium illis ¹² et exeuntes praedicabant ut paenitentiam agerent ¹³ et daemonia multa eiciebant et unguebant oleo multos aegrotos et sanabant ¹⁴ et audivit Herodes rex manifestum enim factum est nomen eius et dicebat quia Iohannes Baptista resurrexit a mortuis et propterea inoperantur virtutes in illo ¹⁵ alii autem dicebant quia Helias est alii vero dicebant propheta est quasi unus ex prophetis ¹⁶ quo audito Herodes ait quem ego decollavi Iohannem hic a mortuis resurrexit ¹⁷ ipse enim Herodes misit ac tenuit Iohannem et vinxit eum in carcere propter Herodiadem uxorem Philippi fratris sui quia duxerat eam ¹⁸ dicebat enim Iohannes Herodi non licet tibi habere uxorem fratris tui ¹⁹ Herodias autem insidiabatur illi et volebat occidere eum nec poterat ²⁰ Herodes enim metuebat Iohannem sciens eum virum iustum et sanctum et custodiebat eum et audito eo multa faciebat et libenter eum audiebat ²¹ et cum dies oportunus accidisset Herodes natalis sui cenam fecit principibus et tribunis et primis Galilaeae ²² cumque introisset filia ipsius Herodiadis et saltasset et placuisset Herodi simulque recumbentibus rex ait puellae pete a me quod vis et dabo tibi ²³ et iuravit illi quia quicquid petieris dabo tibi licet dimidium regni mei ²⁴ quae cum exisset dixit matri suae quid petam et illa dixit caput Iohannis Baptistae ²⁵ cumque introisset statim cum festinatione ad regem petivit dicens volo ut protinus des mihi in disco caput Iohannis Baptistae ²⁶ et contristatus rex propter iusiurandum et propter simul recumbentes noluit eam contristare ²⁷ sed misso speculatore praecepit adferri caput eius in disco et decollavit eum in carcere ²⁸ et adtulit caput eius in disco et dedit illud puellae et puella dedit matri suae ²⁹ quo audito discipuli eius venerunt et tulerunt corpus eius et posuerunt illud in monumento ³⁰ et convenientes apostoli ad Iesum renuntiaverunt illi omnia quae egerant et docuerant ³¹ et ait illis venite seorsum in desertum locum et requiescite pusillum erant enim qui veniebant et rediebant multi et nec manducandi spatium habebant ³² et ascendentes in navi abierunt in desertum locum seorsum ³³ et viderunt eos abeuntes et cognoverunt multi et pedestre et de omnibus civitatibus concurrerunt illuc et praevenerunt eos ³⁴ et exiens vidit multam turbam Iesus et misertus est super eos quia erant sicut oves non habentes pastorem et coepit docere illos multa ³⁵ et cum iam hora multa fieret accesserunt discipuli eius dicentes desertus est locus hic et iam hora praeterivit ³⁶ dimitte illos ut euntes in proximas villas et vicos emant sibi cibos quos manducent ³⁷ et respondens ait illis date illis manducare et dixerunt ei euntes emamus denariis ducentis panes et dabimus eis manducare ³⁸ et dicit eis quot panes habetis ite et videte et cum cognovissent dicunt quinque et duos pisces ³⁹ et praecepit illis ut accumbere facerent omnes secundum contubernia super viride faenum ⁴⁰ et discubuerunt in partes per centenos et per quinquagenos ⁴¹ et acceptis quinque panibus et duobus piscibus intuens in caelum benedixit et fregit panes et dedit discipulis suis ut ponerent ante eos et duos pisces divisit omnibus ⁴² et manducaverunt omnes et saturati sunt ⁴³ et sustulerunt reliquias fragmentorum duodecim cofinos plenos et de piscibus ⁴⁴ erant autem qui manducaverunt quinque milia virorum ⁴⁵ et statim coegit discipulos suos ascendere navem ut praecederent eum trans fretum ad Bethsaidam dum ipse dimitteret populum ⁴⁶ et cum dimisisset eos abiit in montem orare ⁴⁷ et cum sero esset erat navis in medio mari et ipse solus in terra ⁴⁸ et videns eos laborantes in remigando erat enim ventus contrarius eis et circa quartam vigiliam noctis venit ad eos ambulans super mare et volebat praeterire eos ⁴⁹ at illi ut viderunt eum ambulantem super mare putaverunt fantasma esse et exclamaverunt ⁵⁰ omnes enim eum viderunt et conturbati sunt et statim locutus est cum eis et dixit illis confidite ego sum nolite timere ⁵¹ et ascendit ad illos in navem et cessavit ventus et plus magis intra se stupebant ⁵² non enim intellexerant de panibus erat enim cor illorum obcaecatum ⁵³ et cum transfretassent pervenerunt in terram Gennesareth et adplicuerunt ⁵⁴ cumque egressi essent de navi continuo cognoverunt eum ⁵⁵ et percurrentes universam regionem illam coeperunt in grabattis eos qui se male habebant circumferre ubi audiebant eum esse ⁵⁶ et quocumque introibat in vicos vel in villas aut civitates in plateis ponebant infirmos et deprecabantur eum ut vel fimbriam vestimenti eius tangerent et quotquot tangebant eum salvi fiebant