Luc 22.11
Bible en Swahili de l’est

¹ Ikakaribia sikukuu ya mikate isiyotiwa chachu, iitwayo Sikukuu ya Pasaka. ² Na wakuu wa makuhani na waandishi walikuwa wakitafuta njia ya kumwua; maana walikuwa wakiwaogopa watu. ³ Shetani akamwingia Yuda, aitwaye Iskariote, naye ni mmoja wa wale Thenashara. ⁴ Akaondoka, akaenda akasema na wakuu wa makuhani na majemadari, jinsi atakavyoweza kumtia mikononi mwao. ⁵ Wakafurahi, wakapatana naye kumpa fedha. ⁶ Akakubali, akatafuta nafasi ya kumsaliti kwao pasipokuwapo mkutano. ⁷ Ikafika siku ya mikate isiyotiwa chachu, ambayo ilipasa kuchinja pasaka. ⁸ Akawatuma Petro na Yohana, akisema, Nendeni, mkatuandalie pasaka tupate kuila. ⁹ Wakamwambia, Wataka tuandae wapi? ¹⁰ Akawaambia, Tazama, mtakapoingia mjini mtakutana na mwanamume akichukua mtungi wa maji; mfuateni mkaingie katika nyumba atakayoingia yeye. ¹¹ Na mtamwambia mwenye nyumba, Mwalimu akuambia, Ki wapi chumba cha wageni, nipate kula pasaka humo pamoja na wanafunzi wangu? ¹² Naye atawaonyesha chumba kikubwa orofani, kimekwisha andikwa; andaeni humo. ¹³ Wakaenda, wakaona kama alivyowaambia, wakaiandaa pasaka. ¹⁴ Hata saa ilipofika aliketi chakulani, yeye na wale mitume pamoja naye. ¹⁵ Akawaambia, Nimetamani sana kuila pasaka hii pamoja nanyi kabla ya kuteswa kwangu; ¹⁶ kwa maana nawaambia ya kwamba siili tena hata itakapotimizwa katika ufalme wa Mungu. ¹⁷ Akapokea kikombe, akashukuru, akasema, Twaeni hiki, mgawanye ninyi kwa ninyi; ¹⁸ Maana nawaambia ya kwamba tangu sasa sinywi mazao ya mzabibu hata ufalme wa Mungu utakapokuja. ¹⁹ Akatwaa mkate, akashukuru, akaumega, akawapa, akisema, [Huu ndio mwili wangu unaotolewa kwa ajili yenu; fanyeni hivi kwa ukumbusho wangu. ²⁰ Kikombe nacho vivyo hivyo baada ya kula; akisema, Kikombe hiki ni agano jipya katika damu yangu, inayomwagika kwa ajili yenu.] ²¹ Walakini, tazama, mkono wake yeye anayenisaliti upo hapa pamoja nami mezani, ²² Kwa kuwa Mwana wa Adamu aenda zake kama ilivyokusudiwa; lakini, ole wake mtu yule amsalitiye! ²³ Wakaanza kuulizana wao kwa wao, ni yupi miongoni mwao atakayelitenda jambo hilo. ²⁴ Yakatokea mashindano kati yao, kwamba ni nani anayehesabiwa kuwa mkubwa. ²⁵ Akawaambia, Wafalme wa Mataifa huwatawala, na wenye mamlaka juu yao huitwa Wenye fadhili; ²⁶ lakini kwenu ninyi sivyo; bali aliye mkubwa kwenu na awe kama aliye mdogo; na mwenye kuongoza kama yule atumikaye. ²⁷ Maana aliye mkubwa ni yupi? Yeye aketiye chakulani, au yule atumikaye? Siye yule aketiye chakulani? Lakini mimi kati yenu ni kama atumikaye. ²⁸ Nanyi ndinyi mliodumu pamoja nami katika majaribu yangu. ²⁹ Nami nawawekea ninyi ufalme, kama vile Baba yangu alivyoniwekea mimi; ³⁰ mpate kula na kunywa mezani pangu katika ufalme wangu; na kuketi katika viti vya enzi, huku mkiwahukumu kabila kumi na mbili za Israeli. ³¹ Akasema, Simoni, Simoni, tazama, Shetani amewataka ninyi apate kuwapepeta kama vile ngano; ³² lakini nimekuombea wewe ili imani yako isitindike; nawe utakapoongoka waimarishe ndugu zako. ³³ Akamwambia, Bwana, niwapo pamoja nawe, mimi ni tayari kwenda gerezani au hata kifoni. ³⁴ Akasema, Nakuambia, Petro, jogoo hatawika leo, kabla wewe hujanikana mara tatu ya kuwa hunijui. ³⁵ Akawauliza, Je! Hapo nilipowatuma hamna mfuko, wala mkoba, wala viatu, mlipungukiwa na kitu? Wakasema, La! ³⁶ Akawaambia, Lakini sasa mwenye mfuko na auchukue, na mkoba vivyo hivyo; naye asiye na upanga, na auze joho yake akanunue. ³⁷ Kwa kuwa nawaambia, hayo yaliyoandikwa hayana budi kutimizwa kwangu; ya kuwa, Alihesabiwa pamoja na wahalifu. Kwa sababu yanipasayo yanao mwisho wake. ³⁸ Wakasema, Bwana, tazama, hapa pana panga mbili. Akawaambia, Basi. ³⁹ Akatoka akaenda mpaka mlima wa Mizeituni kama ilivyokuwa desturi yake; wanafunzi wake nao wakafuatana naye. ⁴⁰ Alipofika mahali pale aliwaambia, Ombeni kwamba msiingie majaribuni. ⁴¹ Mwenyewe akajitenga nao kama kiasi cha kutupa jiwe, akapiga magoti akaomba, ⁴² akisema, Ee Baba, ikiwa ni mapenzi yako, uniondolee kikombe hiki; walakini si mapenzi yangu, bali yako yatendeke. ⁴³ Malaika kutoka mbinguni akamtokea akamtia nguvu. ⁴⁴ Naye kwa vile alivyokuwa katika dhiki, akazidi sana kuomba; hari yake ikawa kama matone ya damu yakidondoka nchini.] ⁴⁵ Alipoondoka katika kuomba kwake, akawajia wanafunzi wake, akawakuta wamelala usingizi kwa huzuni. ⁴⁶ Akawaambia, Mbona mmelala usingizi? Ondokeni, mkaombe, msije mkaingia majaribuni. ⁴⁷ Basi alipokuwa katika kusema, tazama, mkutano wa watu, na yule aitwaye Yuda, ambaye ni mmoja wa wale Thenashara, amewatangulia. Akamkaribia Yesu ili kumbusu. ⁴⁸ Yesu akamwambia, Yuda, wamsaliti Mwana wa Adamu kwa kumbusu? ⁴⁹ Na wale waliokuwa karibu naye walipoona yatakayotukia, walisema, Bwana, tuwapige kwa upanga? ⁵⁰ Mmoja wao akampiga mtumwa wa Kuhani Mkuu, akamkata sikio la kuume. ⁵¹ Yesu akajibu akasema, Mwe radhi kwa hili. Akamgusa sikio, akamponya. ⁵² Yesu akawaambia wakuu wa makuhani, na maakida wa hekalu, na wazee, waliokuja juu yake, Je! Mmekuja wenye panga na marungu kama kukamata mnyang’anyi? ⁵³ Kila siku nilipokuwa pamoja nanyi hekaluni hamkuninyoshea mikono, lakini hii ndiyo saa yenu, na mamlaka ya giza. ⁵⁴ Wakamkamata, wakamchukua, wakaenda naye nyumbani kwa Kuhani Mkuu. Na Petro alimfuata kwa mbali. ⁵⁵ Na walipokwisha washa moto katikati ya kiwanja, waliketi pamoja, naye Petro akaketi kati yao. ⁵⁶ Ndipo mjakazi mmoja akamwona ameketi mwangani, akamkazia macho akasema, Na huyu alikuwa pamoja naye. ⁵⁷ Akakana, akisema, Ee mwanamke, simjui. ⁵⁸ Baadaye kitambo mtu mwingine alimwona akasema, Wewe nawe u mmoja wao. Petro akasema, Ee mtu, si mimi. ⁵⁹ Halafu, yapata saa moja, mtu mwingine alikaza kusema, Hakika na huyu alikuwa pamoja naye, kwa kuwa yeye pia ni Mgalilaya. ⁶⁰ Petro akasema, Ee mtu, sijui usemalo. Na papo hapo alipokuwa katika kusema, jogoo aliwika. ⁶¹ Bwana akageuka akamtazama Petro. Petro akalikumbuka lile neno la Bwana jinsi alivyomwambia, Leo kabla hajawika jogoo utanikana mara tatu. ⁶² Akatoka nje akalia kwa majonzi. ⁶³ Na wale watu waliokuwa wakimshika Yesu walimfanyia dhihaka, wakampiga. ⁶⁴ Wakamfunika macho, kisha wakamwuliza-uliza wakisema, Tabiri, ni nani aliyekupiga? ⁶⁵ Wakamtolea na maneno mengine mengi ya kumtukana. ⁶⁶ Hata kulipokucha, walikutanika jamii ya wazee, na wakuu wa makuhani, na waandishi, wakamleta katika baraza yao, wakisema, ⁶⁷ Kama wewe ndiwe Kristo, tuambie. Akawaambia, Nijapowaambia, hamtasadiki kabisa. ⁶⁸ Tena, nikiwauliza, hamtajibu. ⁶⁹ Lakini tangu sasa Mwana wa Adamu atakuwa ameketi upande wa kuume wa Mungu Mwenyezi. ⁷⁰ Wakasema wote, Basi, wewe ndiwe Mwana wa Mungu? Akawaambia, Ninyi mwasema kwamba mimi ndiye. ⁷¹ Wakasema, Basi, tuna haja gani tena ya ushuhuda? Maana, sisi wenyewe tumesikia maneno ya kinywa chake.