Psaumes 119.55
Bible en Swahili de l’est

La Parole de Dieu

¹ Heri walio kamili njia zao, Waendao katika sheria ya Bwana.
² Heri wazitiio shuhuda zake, Wamtafutao kwa moyo wote.
³ Naam, hawakutenda ubatili, Wamekwenda katika njia zake.
⁴ Wewe umetuamuru mausia yako, Ili sisi tuyatii sana.
⁵ Ningependa njia zangu ziwe thabiti, Nizitii amri zako.
⁶ Ndipo mimi sitaaibika, Nikiyaangalia maagizo yako yote.
⁷ Nitakushukuru kwa unyofu wa moyo, Nikiisha kujifunza hukumu za haki yako
⁸ Nitazitii amri zako, Usiniache kabisa
⁹ Jinsi gani kijana aisafishe njia yake? Kwa kutii, akilifuata neno lako.
¹⁰ Kwa moyo wangu wote nimekutafuta, Usiniache nipotee mbali na maagizo yako.
¹¹ Moyoni mwangu nimeliweka neno lako, Nisije nikakutenda dhambi.
¹² Ee Bwana, umehimidiwa, Unifundishe amri zako.
¹³ Kwa midomo yangu nimezisimulia Hukumu zote za kinywa chako.
¹⁴ Nimeifurahia njia ya shuhuda zako Kana kwamba ni mali mengi.
¹⁵ Nitayatafakari mausia yako, Nami nitaziangalia njia zako.
¹⁶ Nitajifurahisha sana kwa amri zako, Sitalisahau neno lako.
¹⁷ Umtendee mtumishi wako ukarimu, Nipate kuishi, nami nitalitii neno lako.
¹⁸ Unifumbue macho yangu niyatazame Maajabu yatokayo katika sheria yako.
¹⁹ Mimi ni mgeni katika nchi, Usinifiche maagizo yako.
²⁰ Roho yangu imepondeka kwa kutamani Hukumu zako kila wakati.
²¹ Umewakemea wenye kiburi, Wamelaaniwa waendao mbali na maagizo yako.
²² Uniondolee laumu na dharau, Kwa maana nimezishika shuhuda zako.
²³ Wakuu nao waliketi wakaninena, Lakini mtumishi wako atazitafakari amri zako.
²⁴ Shuhuda zako nazo ndizo furaha yangu, Na washauri wangu.
²⁵ Nafsi yangu imeambatana na mavumbi, Unihuishe sawasawa na neno lako.
²⁶ Nalizisimulia njia zangu ukanijibu, Unifundishe amri zako.
²⁷ Unifahamishe njia ya mausia yako, Nami nitayatafakari maajabu yako.
²⁸ Nafsi yangu imeyeyuka kwa uzito, Unitie nguvu sawasawa na neno lako.
²⁹ Uniondolee njia ya uongo, Unineemeshe kwa sheria yako.
³⁰ Nimeichagua njia ya uaminifu, Na kuziweka hukumu zako mbele yangu.
³¹ Nimeambatana na shuhuda zako, Ee Bwana, usiniaibishe.
³² Nitakwenda mbio katika njia ya maagizo yako, Utakaponikunjua moyo wangu.
³³ Ee Bwana, unifundishe njia ya amri zako, Nami nitaishika hata mwisho.
³⁴ Unifahamishe nami nitaishika sheria yako, Naam, nitaitii kwa moyo wangu wote.
³⁵ Uniendeshe katika mapito ya maagizo yako, Kwa maana nimependezwa nayo.
³⁶ Unielekeze moyo wangu na shuhuda zako, Wala usiielekee tamaa.
³⁷ Unigeuze macho yangu nisitazame visivyofaa, Unihuishe katika njia yako.
³⁸ Umthibitishie mtumishi wako ahadi yako, Inayohusu kicho chako.
³⁹ Uniondolee laumu niiogopayo, Maana hukumu zako ni njema.
⁴⁰ Tazama, nimeyatamani mausia yako, Unihuishe kwa haki yako.
⁴¹ Ee Bwana, fadhili zako zinifikie na mimi, Naam, wokovu wako sawasawa na ahadi yako.
⁴² Nami nitamjibu neno anilaumuye, Kwa maana nalitumainia neno lako.
⁴³ Usiliondoe neno la kweli kinywani mwangu kamwe, Maana nimezingojea hukumu zako.
⁴⁴ Nami nitaitii sheria yako daima, Naam, milele na milele.
⁴⁵ Nami nitakwenda panapo nafasi, Kwa kuwa nimejifunza mausia yako.
⁴⁶ Nitazinena shuhuda zako mbele ya wafalme, Wala sitaona aibu.
⁴⁷ Nami nitajifurahisha sana kwa maagizo yako, Ambayo nimeyapenda.
⁴⁸ Na mikono yangu nitayainulia maagizo yako niliyoyapenda, Nami nitazitafakari amri zako.
⁴⁹ Likumbuke neno ulilomwambia mtumishi wako, Kwa sababu umenitumainisha.
⁵⁰ Hii ndiyo faraja yangu katika taabu yangu, Ya kwamba ahadi yako imenihuisha.
⁵¹ Wenye kiburi wamenidharau mno, Sikujiepusha na sheria zako.
⁵² Nimezikumbuka hukumu zako za kale, Ee Bwana, nikajifariji.
⁵³ Ghadhabu imenishika kwa sababu ya wasio haki, Waiachao sheria yako.
⁵⁴ Amri zako zimekuwa nyimbo zangu, Katika nyumba ya ugeni wangu.
⁵⁵ Wakati wa usiku nimelikumbuka jina lako, Ee Bwana, nikaitii sheria yako.
⁵⁶ Hayo ndiyo niliyokuwa nayo, Kwa sababu nimeyashika mausia yako.
⁵⁷ Bwana ndiye aliye fungu langu, Nimesema kwamba nitayatii maneno yake.
⁵⁸ Nimekuomba radhi kwa moyo wangu wote, Unifadhili sawasawa na ahadi yako.
⁵⁹ Nalizitafakari njia zangu, Na miguu yangu nalizielekezea shuhuda zako.
⁶⁰ Nalifanya haraka wala sikukawia, Kuyatii maagizo yako.
⁶¹ Kamba za wasio haki zimenifunga, Sikuisahau sheria yako.
⁶² Katikati ya usiku nitaamka nikushukuru, Kwa sababu ya hukumu zako za haki.
⁶³ Mimi ni mwenzao watu wote wakuchao, Na wale wayatiio mausia yako.
⁶⁴ Bwana, dunia imejaa fadhili zako, Unifundishe amri zako.
⁶⁵ Umemtendea mema mtumishi wako, Ee Bwana, sawasawa na neno lako.
⁶⁶ Unifundishe akili na maarifa, Maana nimeyaamini maagizo yako.
⁶⁷ Kabla sijateswa mimi nalipotea, Lakini sasa nimelitii neno lako.
⁶⁸ Wewe U mwema na mtenda mema, Unifundishe amri zako.
⁶⁹ Wenye kiburi wamenizulia uongo, Kwa moyo wangu wote nitayashika mausia yako.
⁷⁰ Mioyo yao imenenepa kama shahamu, Mimi nimeifurahia sheria yako.
⁷¹ Ilikuwa vema kwangu kuwa naliteswa, Nipate kujifunza amri zako.
⁷² Sheria ya kinywa chako ni njema kwangu, Kuliko maelfu ya dhahabu na fedha.
⁷³ Mikono yako ilinifanya ikanitengeneza, Unifahamishe nikajifunze maagizo yako.
⁷⁴ Wakuchao na wanione na kufurahi, Kwa sababu nimelingojea neno lako.
⁷⁵ Najua ya kuwa hukumu zako ni za haki, Ee Bwana, na kwa uaminifu umenitesa.
⁷⁶ Nakuomba, fadhili zako ziwe faraja kwangu, Sawasawa na ahadi yako kwa mtumishi wako.
⁷⁷ Rehema zako zinijie nipate kuishi, Maana sheria yako ni furaha yangu.
⁷⁸ Wenye kiburi waaibike, maana wamenidhulumu kwa uongo, Mimi nitayatafakari mausia yako.
⁷⁹ Wakuchao na wanirudie, Nao watazijua shuhuda zako.
⁸⁰ Moyo wangu na uwe mkamilifu katika amri zako, Nisije mimi nikaaibika.
⁸¹ Nafsi yangu imefifia kwa kuutamani wokovu wako, Nimelingojea neno lako.
⁸² Macho yangu yamefifia kwa kuitazamia ahadi yako, Nisemapo, Lini utakaponifariji?
⁸³ Maana nimekuwa kama kiriba katika moshi, Sikuzisahau amri zako.
⁸⁴ Siku za mtumishi wako ni ngapi, Lini utakapowahukumu wale wanaonifuatia?
⁸⁵ Wenye kiburi wamenichimbia mashimo, Ambao hawaifuati sheria yako.
⁸⁶ Maagizo yako yote ni amini, Wananifuatia bure, unisaidie.
⁸⁷ Walikuwa karibu na kunikomesha katika nchi, Lakini sikuyaacha mausia yako.
⁸⁸ Unihuishe kwa fadhili zako, Nami nitazishika shuhuda za kinywa chako.
⁸⁹ Ee Bwana, neno lako lasimama Imara mbinguni hata milele.
⁹⁰ Uaminifu wako upo kizazi baada ya kizazi, Umeiweka nchi, nayo inakaa.
⁹¹ Kwa hukumu zako vimesimama imara hata leo, Maana vitu vyote ni watumishi wako.
⁹² Kama sheria yako isingalikuwa furaha yangu, Hapo ningalipotea katika taabu zangu.
⁹³ Hata milele sitayasahau maagizo yako, Maana kwa hayo umenihuisha.
⁹⁴ Mimi ni wako, uniokoe, Kwa maana nimejifunza mausia yako.
⁹⁵ Wasio haki wameniotea ili kunipoteza, Nitazitafakari shuhuda zako.
⁹⁶ Nimeona ukamilifu wote kuwa na mwisho, Bali agizo lako ni pana mno.
⁹⁷ Sheria yako naipenda mno ajabu, Ndiyo kutafakari kwangu mchana kutwa.
⁹⁸ Maagizo yako hunitia hekima kuliko adui zangu, Kwa maana ninayo sikuzote.
⁹⁹ Ninazo akili kuliko wakufunzi wangu wote, Maana shuhuda zako ndizo nizifikirizo.
¹⁰⁰ Ninao ufahamu kuliko wazee, Kwa kuwa nimeyashika mausia yako.
¹⁰¹ Nimeiepusha miguu yangu na kila njia mbaya, Ili nilitii neno lako.
¹⁰² Sikujiepusha na hukumu zako, Maana Wewe mwenyewe umenifundisha.
¹⁰³ Mausia yako ni matamu sana kwangu, Kupita asali kinywani mwangu.
¹⁰⁴ Kwa mausia yako najipatia ufahamu, Ndiyo maana naichukia kila njia ya uongo.
¹⁰⁵ Neno lako ni taa ya miguu yangu, Na mwanga wa njia yangu.
¹⁰⁶ Nimeapa nami nitaifikiliza, Kuzishika hukumu za haki yako.
¹⁰⁷ Nimeteswa mno; Ee Bwana, unihuishe sawasawa na neno lako.
¹⁰⁸ Ee Bwana, uziridhie sadaka za kinywa changu, Na kunifundisha hukumu zako.
¹⁰⁹ Nafsi yangu imo mkononi mwangu daima, Lakini sheria yako sikuisahau.
¹¹⁰ Watendao uovu wamenitegea mtego, Lakini sikuikosa njia ya mausia yako.
¹¹¹ Shuhuda zako nimezifanya urithi wa milele, Maana ndizo changamko la moyo wangu.
¹¹² Nimeuelekeza moyo wangu nizitende amri zako, Daima, naam, hata milele.
¹¹³ Watu wa kusita-sita nawachukia, Lakini sheria yako naipenda.
¹¹⁴ Ndiwe sitara yangu na ngao yangu, Neno lako nimelingojea.
¹¹⁵ Enyi watenda mabaya, ondokeni kwangu, Niyashike maagizo ya Mungu wangu.
¹¹⁶ Unitegemeze sawasawa na ahadi yako, nikaishi, Wala usiniache niyaaibikie matumaini yangu.
¹¹⁷ Unisaidie nami nitakuwa salama, Nami nitaziangalia amri zako daima.
¹¹⁸ Umewakataa wote wazikosao amri zako, Kwa maana hila zao ni uongo.
¹¹⁹ Wabaya wa nchi pia umewaondoa kama takataka, Ndiyo maana nimezipenda shuhuda zako.
¹²⁰ Mwili wangu unatetemeka kwa kukucha Wewe, Nami ninaziogopa hukumu zako.
¹²¹ Nimefanya hukumu na haki, Usiniache mikononi mwao wanaonionea.
¹²² Uwe mdhamini wa mtumishi wako, apate mema, Wenye kiburi wasinionee.
¹²³ Macho yangu yamefifia kwa kuutamani wokovu wako, Na ahadi ya haki yako.
¹²⁴ Kama zilivyo rehema zako umtendee mtumishi wako, Na amri zako unifundishe.
¹²⁵ Mimi ni mtumishi wako, unifahamishe, Nipate kuzijua shuhuda zako.
¹²⁶ Wakati umewadia Bwana atende kazi; Kwa kuwa wameitangua sheria yako.
¹²⁷ Ndiyo maana nimeyapenda maagizo yako, Kuliko dhahabu, naam, dhahabu iliyo safi.
¹²⁸ Maana nayaona mausia yako yote kuwa ya adili, Kila njia ya uongo naichukia.
¹²⁹ Shuhuda zako ni za ajabu, Ndiyo maana roho yangu imezishika.
¹³⁰ Kufafanusha maneno yako kwatia nuru, Na kumfahamisha mjinga.
¹³¹ Nalifunua kinywa changu nikatweta, Maana naliyatamani maagizo yako.
¹³² Unigeukie, unirehemu mimi, Kama iwahusuvyo walipendao jina lako.
¹³³ Uzielekeze hatua zangu kwa neno lako, Uovu usije ukanimiliki.
¹³⁴ Unikomboe na dhuluma ya mwanadamu, Nipate kuyashika mausia yako.
¹³⁵ Umwangazie mtumishi wako uso wako, Na kunifundisha amri zako.
¹³⁶ Macho yangu yachuruzika mito ya maji, Kwa sababu hawaitii sheria yako.
¹³⁷ Ee Bwana, Wewe ndiwe mwenye haki, Na hukumu zako ni za adili.
¹³⁸ Umeziagiza shuhuda zako kwa haki, Na kwa uaminifu mwingi.
¹³⁹ Juhudi yangu imeniangamiza, Maana watesi wangu wameyasahau maneno yako.
¹⁴⁰ Neno lako limesafika sana, Kwa hiyo mtumishi wako amelipenda.
¹⁴¹ Mimi ni mdogo, nadharauliwa, Lakini siyasahau mausia yako.
¹⁴² Haki yako ni haki ya milele, Na sheria yako ni kweli.
¹⁴³ Taabu na dhiki zimenipata, Maagizo yako ni furaha yangu.
¹⁴⁴ Haki ya shuhuda zako ni ya milele, Unifahamishe, nami nitaishi.
¹⁴⁵ Nimeita kwa moyo wangu wote; Ee Bwana, uitike; Nitazishika amri zako.
¹⁴⁶ Nimekuita Wewe, uniokoe, Nami nitazishika shuhuda zako.
¹⁴⁷ Kutangulia mapambazuko naliomba msaada, Naliyangojea maneno yako kwa tumaini.
¹⁴⁸ Macho yangu yalitangulia makesha ya usiku, Ili kuitafakari ahadi yako.
¹⁴⁹ Uisikie sauti yangu sawasawa na fadhili zako, Ee Bwana, unihuishe sawasawa na hukumu yako.
¹⁵⁰ Wanakaribia wanaonifuatia kwa chuki, Wamekwenda mbali na sheria yako.
¹⁵¹ Ee Bwana, Wewe U karibu, Na maagizo yako yote ni kweli.
¹⁵² Tokea zamani nimejua kwa shuhuda zako, Ya kuwa umeziweka zikae milele.
¹⁵³ Uyaangalie mateso yangu, uniokoe, Maana sikuisahau sheria yako.
¹⁵⁴ Unitetee na kunikomboa, Unihuishe sawasawa na ahadi yako.
¹⁵⁵ Wokovu u mbali na wasio haki, Kwa maana hawajifunzi amri zako.
¹⁵⁶ Ee Bwana, rehema zako ni nyingi, Unihuishe sawasawa na hukumu zako.
¹⁵⁷ Wanaonifuatia na watesi wangu ni wengi, Lakini sikujiepusha na shuhuda zako.
¹⁵⁸ Nimewaona watendao uhaini nikachukizwa, Kwa sababu hawakulitii neno lako.
¹⁵⁹ Uangalie niyapendavyo mausia yako, Ee Bwana, unihuishe sawasawa na fadhili zako.
¹⁶⁰ Jumla ya neno lako ni kweli, Na kila hukumu ya haki yako ni ya milele.
¹⁶¹ Wakuu wameniudhi bure, Ila moyo wangu unayahofia maneno yako.
¹⁶² Naifurahia ahadi yako, Kama apataye mateka mengi.
¹⁶³ Nimeuchukia uongo, umenikirihi, Sheria yako nimeipenda.
¹⁶⁴ Mara saba kila siku nakusifu, Kwa sababu ya hukumu za haki yako.
¹⁶⁵ Wana amani nyingi waipendao sheria yako, Wala hawana la kuwakwaza.
¹⁶⁶ Ee Bwana, nimeungojea wokovu wako, Na maagizo yako nimeyatenda.
¹⁶⁷ Nafsi yangu imezishika shuhuda zako, Nami nazipenda mno.
¹⁶⁸ Nimeyashika mausia yako na shuhuda zako, Maana njia zangu zote zi mbele zako.
¹⁶⁹ Ee Bwana, kilio changu na kikukaribie, Unifahamishe sawasawa na neno lako.
¹⁷⁰ Dua yangu na ifike mbele zako, Uniponye sawasawa na ahadi yako.
¹⁷¹ Midomo yangu na itoe sifa, Kwa kuwa unanifundisha mausia yako.
¹⁷² Ulimi wangu na uiimbe ahadi yako, Maana maagizo yako yote ni ya haki.
¹⁷³ Mkono wako na uwe tayari kunisaidia, Maana nimeyachagua mausia yako.
¹⁷⁴ Ee Bwana, nimeutamani wokovu wako, Na sheria yako ndiyo furaha yangu.
¹⁷⁵ Nafsi yangu na iishi, ipate kukusifu, Na hukumu zako zinisaidie.
¹⁷⁶ Nimetanga-tanga kama kondoo aliyepotea; Umtafute mtumishi wako; Kwa maana sikuyasahau maagizo yako.